Ich Albrecht der Rossel vnd ich Hainreich der Rossel, sein pruder, Hainreichs dez R/osslein sun von Alburch, vnser hawsfrawn vnd all vnser erben vnd nachkomen, veriehen vnd tun chunt allen den, di den brif ansehent oder h/ornt lesen, daz vns her Fridreich der Slaikch, zu den zeiten maister dez spitals sand Katrain an dem fuzz der prukk ze Regens(purch) vnd di samnung doselben, di besunder fudrung vnd genad getan habent nach vnsrer vleizz(gen) pet, daz si vns ir willen vnd gunst darzu geben vnd erlaubt habt, daz wir vnser genad vnd recht, di wir gehabt haben von iren genaden vnd von irem spital, auf der hub ze Alburch, di ir vnd irs spitals freyz aigen ist, verchawfft vnd aufgeben haben von vnsrer anligenten notdutfft wegen, Hainreichen dem Hendlein ze Alburch, seiner hawsfrawn vnd iren erben vmb zehen pfunt Regens(purger) pfenning, der wir verricht vnd gewert sein, vnd also verzeihen wir vns mit dem gagenb/urtigen brif, daz wir f/urbaz hintz dem spital noch hintz dem spitalmaister vnd der samnung doselben noch hintz allen iren nachkomen noch hintz irer vorgenanten aigen hub ze Alburch vnd waz darzu geh/ort, ze veld vnd ze dorff, besucht vnd vnbessucht, dhain ansprach noch vodrung nicht mer haben noch gewynnen sullen noch enm/ugen, weder mit gaistleichem noch werltleichem rechten noch on recht, chlain noch groz noch anders yemant von vnsern wegen, in dhainerlay weis noch vmb dhainerlay sach, vnd ob wir furbaz mit in oder mit yemant anders chriegten oder rechten von iren wegen oder von der vorgenanten hub vnd sach wegen, ez w/ar mit gaistleichem oder werltleichem rechten oder on recht, daz sullen si vnd ir spital allez vnd an aller stat behabt haben vnd wir verlorn haben. Daz in daz allez also st/at vnd vnzebrochen beleib, dar/uber zu einem vrch/und geben wir in vnd irem spital den brif versigelten mit der erbern vesten ritter, hern Hansen dez Satelpoger von Liechtenekk zu den zeiten richter zu Strawbing vnd hern Albrecht dez Nothaft von Wernbekch, di si an den brif gelegt habent nach vnsrer vleizzigen pet, der sach zu einer zeukchn/uzz in peden vnenkolten, darvnder wir vns verpinden mit vnsern trewn st/at ze halten waz an dem brif verschriben ist, wan wir nicht aigner insigel haben. Der sach sind zeug: her Marquart der Sanczpekch, Ott der Tumair vnd Peter der schreiber, ped dez spital bereiter. Daz ist geschehen nach Cristi gepurtt dreczehenhundert jar vnd in dem viervndsibentzgisten jar an sand Andres abent dez heiligen zwelfpoten.