Ich Hainr(eich) in dem Gatern, burger zu Regenspurchk, mein hausfraw vnd all vnser erben vnd nachkomen :I bechennen offenleich an dem brief allen den, die in sehent, h/orent oder lesent, daz vns Mertein der Gebenpechk, an der zeit maister dez spitals an dem f/uzz der pruchk zu Regenspurchk vnd gemainchleich die sampung doselben, recht vnd redleich verlihen vnd lassen haben iren vnd dez spitals aigen paw vnd /achker, die gelegen sind in dem nidern purchkvelld mit sampt dem haws vnd der hofstat, gelegen in dem St/aczenpach, darinne si ir swoig etwen gehabt haben dazz osten fridleich vnd freileich zu wesiczen mit allen eren, rechten vnd nuczen, alz si dieselb darauf gehabt haben; also daz wir daz pewleich vnd wesenleich halten sullen mit aller zugehorung von liechtmess, die vergangen sind darnach newn ganczew jar, die schirst nach einnander chument mit der weschaiden, daz wir dem vorgenanten spital die obgenanten newn iar jarleich davon dienen vnd geben sullen nach weschawng vnd rat, vir erberger mann rat, zwair auf irem tail vnd zwair auf vnserm tail; vnd ob vns dieselben vir man nach weschawng nicht wol vberain mochten pringen, so sullen wir, swelchz iars daz geschach, dem vorgenanten spital den virden meczen oder daz vird schaf getraides, welcherlay da[z] ist, vnd alz vil sein auf vorgenanten paw vnd velld gewachsen ist, antwurten vnd geb[en] auf iren kasten in [dem] obgenant spital oder wo si hin wellent an all ir m/ue vnd schaden 6vnd an [alle]w widerred [...] lassen vir tagwerch wismatz, gelegen pey Newnhawsen, daz wir daz [pilleich] nuczen vnd niessen s[ullen alz] si selb, vnd sullen in auch jarleich davon geben ein halbs pfunt pfenning Regenspurger muntz zu [wy]sgelt an sand Haymerans abent oder an seinem tag; vnd die vorgenanten traid[gult mit sampt dem wisgelt sullen wir in dienen vnd geben jarleich] zu rechter zinszeit vnd weil (!) es herrendienst vnd gultrecht ist an allew widerred, vnd daz vns dez nichtz engen noch [irren] sol in dhainerlay weis; auch so su[llen] si vns die obgenanten newn jar geben zehen fuder gesnaitz prennholtz; die sullen wir selber [ha]wn vnd mit vnser selbs fur holen, wo si vns daz zaigen in iren holtzern. Si sullen vns auch den egenanten hof, daz erst [iar] an allerlay zimer vertigen vnd pessern, wo dez not ist an allen vnser[n] schaden, daz wir darinn weleiben m/ugen vnd darnach die andern jar, ob ichtz enprast, an dez vorg(enanten) hofs zimer, so sullen si geben den z[ew]g, so sullen wir geben chost vnd lon, daz daz gepessert vnd gewendet werd, alz oft dez not geschicht. Wir schullen auch jarleich in ir stift chvmen, wenn si vns darein vodern, als ander ir pawrn vnd vnserr stift recht tun an all ir m/ue. Swelchs iars wir daz obgenant veld vnd paw mit sampt dem vorgenanten hof nicht wesenleich vnd pewleich hielten mit aller handlung vnd zugeh/orung, zu velld vnd zu dorff, so haben si vollen gewalt, iren frumen damit schiken, wie si wellen, an all vnser irrung vnd hindernuzz. Vnd wenn auch die obgenanten newn iar hin vnd vergangen sind, so ist in vnd irem gotzhaws der obgenant paw vnd hofstat zu durchslatz ledig vnd los worden mit aller zugehorung. Wir sullen in auch den egenanten hof gesaten, pewleich vnd wesenleich ligen lassen, daz wir darauf noch yemant von vnsern wegen ichtz zu sprechen s/ullen haben in dhaynerlay weis an gevar. Dez zu vrchund geben wir in den brief versigelten mit dez erbergen hern Hansen dez probstz anhangentem insigel, der daz durch vnser fleizzigen pet willen an den brief gehangen hat, im vnd seinen erben vnengolden vnd an schaden. Daz ist geschehen nach Cristi gepurt drewczehenhundert jar vnd darnach in dem funfvndnew[n]czigistem jar an sand Dorothen tag der heiligen jvnchkfraun.