Nycolaus dei gratia ecclesie Ratisponen(sis) episcopus universis decanis, plebanis et aliis ecclesiarum rectoribus per Ratisponen(sis) dyocesis constitutis salutem in domino Iesu Christo. Innotuit nobis, quod quidam ex vobis dilectos in Christo fratres hospitalis nostri Ratisponen(sis), cuius promotiones favore prosequimur speciali, pro colligendis ad vos elemosinis venientes, occasione aliorum collectorum seu petentium interdum repellunt et admittere contradicunt, vel si quando admissi fuerint, tam per vos quam ecclesiarum vestrarum procuratores, qui Zechmaister vulgariter nuncupantur, immoderata porcio requiritur et recipitur ab eisdem. Quare vobis universis et singulis in virtute sancte obediencie et sub penis suspensionis officiorum precipimus firmiter et districte, quatenus non obstante qualibet suspensione collectionis elemosinarum, quocumque tempore per nos facta vel facienda seu etiam alio quolibet petente exceptis nunciis nostre kathedralis ecclesie, quos omnibus aliis preferri volumus ipsos fratres de cetero, quotiens ad vos venerint, admittere in suis petitionibus debeatis, nec eciam collectarum per eos elemosinarum aliquam recipiatis vel per predictos procuratores permittatis recipi portionem nisi de ipsorum fratrum bona et spontanea voluntate vobis vel eisdem aliquid fuerit erogatuma. Si vero dicti Zechmaister desistere noluerint a requisitione huiusmodi elemosinarum seu portionum earundem, eos ad hoc per subtractionem divinorum per vos conpelli volumus et artari. Prefatum enim hospitale per vos tanto maiori diligencia diligimus et petimus in suis negociis omni tempore promoveri, quanto eidem fortior incumbit necessitas ex multitudine qua frequenter deprimitur infirmorum. Nos etiam omnibus vere penitentibus et contricis, qui predicti hospitalis infirmis suas elemosinas dederint, quadraginta dies iniuncte penitencie misericorditer in domino relaxamus. Ratas et gratas habentes indulgencias a quibuscumque dominis archiepiscopis seu episcopis predictorum infirmorum traditas et concessas.. Datum Ratispone anno domini millesimo trecentesimo quartodecimo, sabbato ante nativitate virginis gloriose.