Ich /Vlreich der Gayger vnd ich /Vlreich der Cholbe, vnser hawsfrawn vnd vnser erben veriehen offenleich mit disem brief allen den, die in :I sehent oder h/orent lesen, daz vns vnser gnedigen herren, der Spytalmaister ze Regensp/urch vnd der conuent doselben, lazzen habent iren vnd ires spytals aygen weyngarten an dem Sant, den wir paide p/awen vnd inne haben von vnser frawntag ze lyechtmesse der schrift ch/umt vnd dornach zwelf gantze/w iar mit der bescheiden, daz wir in vnd irem gotzha/us j/arleich dovon geben sch/ullen den vierden einer verrichtz weins, an allen iren schaden vnd gepresten, vnd einen hengelp/uschel vorauzz. Wir sch/ullen auch vnsern egenanten herren geben, czway tail hopfens aller j/arleich alz vil vnd sein doran gewechset, so geuellet vns der drittail; dorz/u sch/ullen si vns geben die hopfstang mit der zale alz vil vnd wir der doz/u bed/urffen, vnd swenne der hopfe abgenomen wirt, so sch/ullen wir in die egenanten hopfstang wider antwurten mit der zale an abganch. Ez ist auch getaydingt worden, daz wir vnsern drittail hopfens j/aleich sch/ullen vnsrer egenanten herren anpieten ze cha/uffen, dorz/u sch/ullen wir ainen nemen vnd si den andern die vnsern drittail schatzen, vnd swie vns dieselben vnsern egenanten herren vnsern drittail haizzent geben, daz sch/ullen wir st/at haben vnd den sch/ullen si vns danne wezalen mit beraitem gelt, wolten aber vnser egenant herren vnsers drittailz hopfens nicht, so m/ugen wir in vercha/uffen swem wir wellen. Wir gehaizzen auch pei vnsern trewen den egenanten weingarten pa/wleich ze stellen mit aller arbeit die dorz/u geh/ort, vnd swenne die egenanten zwelf iar vergangen vnd hin sint, so ist vnsern egenanten herren von vns der oben genant weingart ze d/urchsl/acht ledikch worden an alle vnser widerrede, also daz wir, vnser hawsfr/awn, vnser erben noch n/ymt von vnsern wegen f/urbazzer dehain ansprache noch voderung dornach noch dorauf haben sch/ullen noch enm/ugen, chleinew noch grozze/w mit dehainen sachen. Dor/vmbe ze einem /vrch/und vnd ze einer besteticheit, daz in allez daz, daz oben geschriben ist, stat vnd vnzerbrochen beleibe, geben wir in disen brief versigelten mit dez erberigen mannes insigel, her Herman dez St/oren, ze den zeiten rycht/ar in der vorstat ze Regensp/urch, der ez d/urch vnserr vleizzigen pet an disen brief gelegt hat im an schaden; dorvnder wir vns verpinden pei vnsern trewen an geu/ar, allez daz ze laisten vnd ze volf/uren daz vor wenant ist. Daz ist geschehen nach Christes gep/urtt dreutzehenh/undert iar vnd in dem f/umfczigistem iar an sand Pauls tag alz er bechert wart.