Ich Hainreich der Swartzz, Hainreichs dez Swartzzen seligen sun, der weilent mair waz ze Malgozzing, vnd mein hawsfr:Iaw vnd ich Ofaim sein swester vnd all vnser erben vnd nachkomen veriehen vnd tun chunt allen den, di den brif ansehent oder h/ornt lesen, daz wir mit verayntem rat vnd mit gutem willen vnserew pawrecht vnd allew vnserew recht vnd ansprach, di wir gehabt haben auf dem hof ze Malgozzing, der dez spitals sand Katrein an dem fuzz der prukk ze Regens(purch), freyes aigen ist, recht vnd redleich ze durchslecht verchawfft vnd geben haben als chawffs recht ist, hern Fridreich dem Slaikchen, zu den zeiten maister dez spitals doselben vnd gemainleich di sammung doselbs vmb syben pfunt Regenspurger pfenning, der si vns verricht vnd gewert habent mit beraitem gelt, on allen vnsern schaden vnd gepresten, als verre daz wir auf den vorgenanten hof ze Malgozzing auf di pawrecht noch auf allez daz, daz darzu geh/ort, ze veld vnd ze dorff, besuchtt vnd vnbesucht, dhain ansprach noch vodrung nicht mer haben noch gewynnen s/ullen noch enm/ugen, weder mit gaistleichem noch werltleichem rechten noch on recht, chlain noch groz, f/urbaz nymmer mer noch anders yemant von vnsern wegen in dhainerlay weis. Darzu haben wir in auch gehaizzen vnd gelobt mit vnsern trewn, daz wir in di vorgenanten pawrecht auf dem vorgenanten hof versten vnd versprechen s/ullen vnd wellen mit dem rechten, als dez landez vnd der hofmarch recht ist, do der vorgenant hof inn gelegen ist, on allen iren vnd irs spitals schaden. T/aten wir dez nicht vnd daz wir in vnd irem spital nicht allez daz stet hielten vnd volfurten, daz an dem brif verschriben ist, welhen schaden si dez nement, wie der schaden genant ist, den si oder ir schempoten gesprechen m/ugen bey iren trewn, on ayd vnd on allew beredn/uzz; denselben schaden allen s/ullen wir in vnuerschaidenleich vnd gentzleich abtun vnd widerchern, vnd si s/ullen vnd m/ugen auch dez allez von vns vnd von aller vnsrer hab, besucht vnd vnbesucht, bechommen, mit gaistleichem oder werltleichem rechten oder on recht, wann vnd wie si wellent, on allew irrung vnd hindern/uzz. Vnd ob wir oder yemant von vnsern wegen dar/uber von der vorgenanten sach wegen mit in chriegten oder rechten, mit gaistleichem oder werltleichem rechten oder on recht, daz s/ullen si vnd ir nachkommen allez behabt haben vnd wir verlorn haben, on allew widerred. Daz in vnd irem spital, vnd allen iren nachkomen, daz allez also stet vnd vnzebrochen beleib, dar/uber zu einem vrchund vnd zu einer bestetichait, geben wir in den brif versigelten mit der erbern, weisen herren, hern Otten Quensten, chorherre auf dem tum ze Regens(purch) vnd hern Eberwein dez Valkchenstainer von Zaitzchofen, vnd hern Hannsen, seins suns insigeln, di all drey irew insigel an den brif gelegt habent nach vnserer vleizzigen pet, der vorgeschriben sach vnd teiding zu einer gezewkchn/uzz, in allen on schaden vnd vnenkolten, darvnder wir vns verpinden mit vnsern trewn stet ze halten, waz an dem brif verschriben ist, wan wir nicht aygner insigel haben. Der sach sind teydinger gewesen: her Ott von Quensteten, her Chunrat von Quenstaten, ped chorherren auf dem tum ze Regens(purch), her Ebenwein der Valkchenstayner, her Hanns, sein sun vnd Ott der Tumair, zu den zeiten dez spitals bereiter. Daz ist geschehen nach Cristi gepurtt drewczehenhundert jar vnd in dem viervndsibentzgisten jar dez nochsten montagz nach sand Giligen tag.