Ich bruder Fridreich maister dez spytales meiner fr/awen sand Katereyn an dem f/vzze der prvkke ze Regenspurch vnd /vberal die sammen/vng dezselben spitales, veriehen vnd tvn chvnt allen den, die disen brief ansehent oder h/orent lesen, daz wir mit gemaynem rat vnd mit gutem willen vnbetw/vngenleichen ze l/osen haben geben den Wirdehof der gelegen ist bei Wirde in dem Sakche der recht lehen ist von vnserm gen/adigen herren dem pischof ze Regenspurch vnd der dez spitales satze waz von den erwerigen herren den trvchsatzzen von Haylsperch, den got genade, dem erwerigen vnd vesten ritter herm Ch/vnrat dem Nothaft von Haylsperch seiner hausfrawn vnd iren eryben vmb hvndert pfvnt vnd vmb f/vmfvndzwayntzich pfvnt allez Regenspurger pfenning der sie vns gar vnd g/antzleichen verricht vnd gewert habent mit beraiten pfenning an allen vnsern schaden vnd gepresten als verre daz wir hintz dem vorgenanten hof vnd swaz darzv geh/ort, ze veld vnd ze dorffe, besucht vnd vnbesvcht, dehain ansprache noch vodervng darauf noch darnacht nicht mer haben noch gewinnen schullen noch enm/ugen, weder mit recht noch an recht, gaistleichem noch werltleichen rechten, chlain noch groz f/urbaz nimmer mer noch anders niemant von vnsern wegen noch anders niemant von der d/urftigen wegen. Daz in daz also st/at vnd vnzerbrochen beleib, darvber ze einem vrchunde vnd ze einer best/atichait geben wir in disen brief versigelten mit vnsers genadigen herren vnd gaistleiches vater insigel, pyschofs Fridreichs ze Regenspurch vnd auch mit vnsers spytals gemaynem insigel. Daz ist geschehen do man zalt von Christes gepurt drevtzehenhvndert jar vnd darnach in dem n/awnvndviertzigistem jar dez montages vor sand Katerein tag der heyligen jvnchfrawen.