Ich Peter der Denkchlinger, ich Angnes sein hawsfraw, veriehen f/ur vns, f/ur vnser fr/eunt vnd f/ur alle vnser eriben vnd nachk/omen, offenleichen mit dem brief allen den, die in ansehent oder h/ornt lesen, daz wir vns mit vnserm g/utem willen vnd nach vnsrer freunt rat verricht, verschaiden vnd vertaidingt habent mit dem spital, mit dem spitalmaister vnd mit dem ganczen conuent dez spitals sand Katrein an dem f/uzz der prukk z/u Regens(purch) vnd mit dez spitals pflegern, die yez/u sind oder f/urbas werdent, vmb alle die aufl/auff, chrieg, ansprach vnd voderung, die wir hincz in, hincz irem spital vnd hincz allen iren g/uten gehabt haben, swie sich daz allez verl/auffen vnd vergangen hat, nichcz auzgenomen, vnd f/ur dieselben chrieg, ansprach vnd voder/ung habent si vns gegeben an zwaidreizzikch pfunt Regenspurger pfenning, der si vns mit beraitem gelt vericht vnd gewert habent, an allen vnsern schaden, also daz wir noch vnser eriben vnd nachkomen hincz in noch hincz irem spital noch hincz allen iren l/auten vnd g/uten, swo si die habent, nicht mer ze sprechen noch ze vodern haben noch gewinnen sullen noch enm/ugen, chlain noch groz, f/urbaz ewichleichen nymmer mer noch anders nyemant von vnsern wegen in dhainerlay weiz. Wann wir vns dez allez ze durichsl/acht verzigen haben vnd auch g/anczleichen verzeichen mit dem gagenb/urtigem brief, auzgenomen der pawrecht die wir auf irem aigem hof ze Denkchling haben vnd den wir in vnd irem spital i/arleichleichen trewleichen verdienen schullen vnd wellen nach ires salp/uchs sag, nach genaden vnd ob wir oder yemant anders von vnsern wegen die taiding vnd schidung alz voruerschriben ist, in chain(er)lay weiz vberf/urn, dez wir beweist wurden mit worhait, swelichen schaden si, ir l/aut vnd ir g/ut dez nement, swie sich daz f/ugt, dezselben schadens, allez m/ugen si von vnz vnd von aller vnsrer haben, die wir haben, besucht vnd vnbes/ucht, bechomen swie sie wellent vnd vmb swen wir oder yemant anders von vnsern wegen vber daz allez mit in chriegten oder rechten, mit gaistleichem oder werltleichem rechten oder an recht, daz sullen si vnd ir spital vnd ir nach/omen vnd alle ir l/aut allez behabt haben an aller stat, vnd wir g/anczleichen verloren, an alle widerred vnd swelichen schaden si oder ir spital, ir l/aut vnd ir g/ut derselben chrieg vnd recht nement, dez sullen vnd m/ugen si allez an aller stat von vns vnd von aller vnsrer hab, vnuerschaidenleichen vnd g/antzleichen, swann vnd swie si wellent bechomen, an alle irrung vnd hindern/uzze. Daz daz allez also st/at vnd vnzerbrochen beleib, dar/vber z/u einem vrch/und vnd z/u einer best/atichait, gib ich obgenanter Peter der Denkchlinger in den brief versigelten mit meinem insigel f/ur mich, f/ur mein vorgenant hawsfr/awn vnd f/ur alle vnser eriben vnd nach/omen vnd mit der weysen, vesten ritter hern L/awtwein dez Rainer von Rain, hern Hansen dez Satelpoger von Liechtenekk z/u den zeyten rihter z/u Strawbing vnd hern Hansen dez Stainacher vom Saelstain(?) z/u den zeyten pfleger z/u Chelhaim insigelen, die der sache schidl/aut, zeug vnd taidinger gewesen sind vnd die auch alle irew insigel an den brief gelegt haben nach vnsrer vleizzen pet der sache z/u ainer gezeuchn/uzze, in venenkolten, vnd der sache sind auch zeug her Vlreich der Gotschalch, her Albrecht der Haidolfinger, kamer/ar vnd b/urger z/u Strawbing vnd Ch/unrat der chastner von Obernm/unster, b/urger z/u Regens(purch) vnd andrer erweriger l/aut gen/ug. Daz ist geschehen nach Christez gep/urt drewtzzehenh/undert iar vnd in dem drewvndsibenczigistem iar an sand Peter vnd sand Pauls abent der heiligen zwelifpoten.