Nos Chvnradus magister totusque conventus fratrum hospitalis Rat(ispone) presentis littere :| testimonio profitemur, quod unanimi voluntate ad studiose petitionis instantiam venerabilium virorum, domini Rymari videlicet propositi sancti Magni fratrumque ipsius, aream nostram in Chærræn sitam, curie nostre ibidem attinentem, quam tunc Wernherus vinitor ad censum quadraginta denariorum inhabitabat, perpetuo possidendam eis locavimus, hac ab ipsis mutui viris obligatione recepta, quod et ipsi quadraginta denarios Ratisponensium monete tunc usuales, nomine census de prefata area singulis annis in festo sancti Emmerami domui nostre persolvere teneantur. In quo si negligentes extiterint, post lapsum termini prenotati ad duplicandi census penam cessante contradictione qualibet teneantur. Igitur ne quid huius rei sinceritatem in predictorum venerabilium detrimentum aliquatenus violare possit, quod favorabili concessimus affectu, nostri sigilli munitum testimonio perpetue firmitatis robore volumus perdurare. Datum in domo hospitalis anno domini millesimo CCCo, in vigilia sancti Nicolai.