We de rad der stad to Hildensem bekennet unde betuget openbare, dat vor uns quamen Hinrick Munße, Eggert Migge unde Hermen Bringh uppe eyne unde Hanneke, wedewe Eggerdes Miggen des eldern, uppe ander syd. De benomden Hinrick, Eggert unde Hermen anclagen de benomden Hanneken alße umme sodanne goidere, de onne unde oren husfrouwen van Hinrick Miggen orem brodere angestorven unde angevallen weren, de se under sek hedde. Darto antworde de benomden Hanneke unde leit seggen, se hedde mit Hinrick Miggen vorbenomd in sodannen goideren in deme sameden geseten unde hopede, dat se one van sodannen goideren nichtes plegende [...]. Alße se nu clage unde antworde vor uns vorludet hadden, satten se dat an beiden halven an uns in fruntschop edder in rechte se darover to scheidende. Des so hebbe wy se darover gescheiden in dusser wys, so dat Hanneke vorbenomd den [ergescrevenen] Hinrick, Eggerde unde Hermen von sodannen des genanten Hinrick Miggen nagelatene goideren schal geven negente[in lodige mark v]ere schillinge unde veer penninge unser nyen penninge, unde den na schalt se van der benomden Hanneken [...] unde vorscheiden [...]. To bekantenisse dusser stugke hebben wy unser stad ingesegel an dussen breff hengt, na goddes bord Veerteinhundert jar darna in deme sestigesten jare, am dage sanctorum Crispini et Crispiniani martirum.