Ek Hinrick Koninges, borger to Hildensem, bekenne openbare in dussem breve vor mek, myne erven unde vor den besitter mynes huses unde wonige uppe dem Ezelstige vor dem Fresendore belegen unde mit mynem hir angenden ingesegel, dat ek mit witschup unde tuchnisse dusser nabeschreven myner frunde mek mit den ersamen unde vorsichtigen mynen heren dem rade der stad to Hildensem sodaner tosage, alse ek to den vorbenomden mynen heren hadde edder de besitter mynes vorgescreven huses unde wonige in tokomenden tiden hebben mochte van des blekes wegen twischen dem Fresendore unde mynem vorgescreven huse van des graven, walles unde van des fangen wegen Hermen Bartrammes, mit one gutliken unde wol to dangke vordregen hebbe unde segge jegenwordigen desulven myne heren den rad unde de stad to Hildensem solker unde aller anderen tosage in crafft dusses breves quid, ledich unde los, so dat ek edder nemant van myner wegen sodann unwillen noch reppen edder uptheyn schullen noch enwillen, nu effte in tokomenden tiden, wente wy uns des under anderen gensliken wol hebben vordregen. Unde weret, dat numer ek, mine erven edder de besitter mynes vorschreven huses unde wonige van des walles edder waters wegen, so desulve wal to mynem huse wort geven mochte, yenigen bewisliken scaden leden edder in tokomenden tiden lidende worden, des willen uns de vorbenomde unse heren vamm rade unde ore nakomen scadelos holden unde vor scaden bewaren. Alle dusse vorgescreven stugke unde artikele love ek Hinrick Koninges vorbenomd vor mek, mine erven unde den besitter mines vorscreven huses unde wonige den erbenomden minen heren borgermestern unde radmannen to Hildensem in guden truwen stedevast unvorbroken wol to holdende sunder alle list unde geverde, unde hebbe gebeden dusse nabescreven mine frunde, dith mit my umme merer bekantnisse so to vorsegelende, unde wy Hinrick Eyledes unde Hans Stalberch bekennet under unsen ingesegeln in dussem sulven breve, dat wy umme bede willen Hinrick Koninges dussen so gedan hebben unde uns dusse fruntlike vordracht unde handel mede witlik is, unde wy de rad der stad to Hildensem bekennet in dussem sulven breve, dat wy dyth vorgescreven so angenamen hebbet. To bekantnisse dusser stugke hebbe wy unser stad ingesegel tovoren an dussen breff gehenget, na goddes bord Verteinhundert darna in deme eynundeachntigesten jare, ame dinxdage erst na dem sondage Judica in der hilgen Vasten.