Wy de rad der stad to Hildensem bekennet openbare in dussem breve vor uns unde unse nakomen, dat wy van heren Hinrick Lütemanne upgebort unde entfangen hebben twehundert lutke punt penninge, de wy vort in unser gemenen stad nuth unde fromen gekart. Hervor hebben wy demsulven heren Hinrick Lutemanne, sinen testamentarien effte holder dusses breves mit orem gudem willen uthe unser stad redesten upkomen unde renthen vorkofft achte lutke punt penninge jarlikes tinses, de wy ohne van unser stad wegen allejarlikes plichtich sin to gevende, de helffte up Paschen unde de anderen helffte up sunte Michelis dach. Aver wy hebben uns unde unsen nakomen de macht unde wilkor allene beholden, alse dat wy allejarlikes twischen sunte Johannis dage to Middensommere unde Unser Leven Fruwen dage Crutwiginge heren Hinrick Lütemanne vorbenomd unde sinen medebescrevenen de loeze unde wedderkop dusses benomden tinses kundigen moget, unde welkes jars wy dat deden, denne darna tomm negesten tokomende sunte Michelis dage sint wy van unser stad wegen den erbenomden tins vor twehundert lütke punt penninge van heren Hinrick Lutemanne vorbenomd edder van sinen medebescreven plichtich wedder to kopende, de wy ohne denne wol to dangke weddergeven unde betalen willen mit bedagedem tinse unde ifft des tinses vor icht enbroken unde entseten were, to gevende sunder weddersprake, unde hebben dusses to vorderem orkunde unser stad ingesegele gehengt an dussen breff, na godes bort Vofftenhundert ime dertenden jare, ame avende sancti Galli.