Anno domini XVc achteundtwintig, mitwekens nach Lucie virginis. Suntemal wy de rad der stad to Hildenßem im vorgangen jare unse viande an stede, dar wy der vormodende weren, soken laten und desmals Hinrick Bolen mit sinem knechte Hinrick Keiseberge darsulvest gefunden und an uns fenckligk gebracht, dessulven morgens by uns etwelcke van Hameln yrschenen und dat desulve Hinrick und sin knecht der van Hameln viande weren sick beclaget und ße nicht van uns komen to laten flitig gebeden und darnachmals ock schriftlig vam rade und muntlig van den geschickeden der van Hameln by uns beclaget und eine rume tid in unsern heften fencklig erholden, idoch denne angefangen clagen neine folge des rechten geschein, wurumb der gefangen frunschop mannich mall forderung und schrifte an uns gan laten, darinne flitigen gebeden, oren frund sambt sinem knechte in de herberge in borgen hande komen to laten, mit sodaner milden erbedinge, darvor genochsame borgen to stellen, dat Hinrick Bole und sin knecht einen idern allikewoll, id were to live, gude, halse, hande efte sustent, to antworden wolden und scholden bereth weßen, dar de frunschop sulves sampt den andern borgen, de ße settenn worden, mede vor wolden loven und gudseggen; datsulve milde und hoge erbident wy obgenanter rad angesehn und up sullig flitig erfordernt und erbedent der frunschop Hinrick Bolen sampt sinem knechte Keyseberge up nachfolgende wyße in de herberge sweren laten, alße dat ße, wanner wy to jenniger tid besint worden, ße in to komen escheden, alsedenne van stund ahn nergens anders hen, wen to uns to komende willen willig und beret sin. Oft ock jemant, he were we de were, ße rechtlig, eth andrepe liff, gud, halss und hand ader sustent, mit one tosproke hedde, dat ße ane jennige weigerunge und utflucht schullen und willen tor andtword irschinen und gehorsamlicken pareren und sick darvor ader van keins weiges absolvern, entledigen efte quiten laten ofte mit einiger andern list, wu me dat ader mochte erdencken ader alredes erdacht were, denne ader itz, uth to teinde und to winden unbesint. Darneffen willen ße in der herberge alstedes bliven und dages ader nachtes in neine wise by densulven oren eheden dar uth nicht wiken ader wancken, id geschege denne mit wetten, willen und fulborde unsers des rades. Und des to einer wissenheit und vestliger erholdinge ores loftes und ehedes Hinrick Bolen frunschop hebben uns nabeschreven borgen gesattet: Und wy Hermen Nolte, Arnd Gribbenitze, Hans Wulffhagen, Franß Pyll, Henningk Keyseberg, Conradt Perberch, Lodewich Schowarte, Hans Wynneken, Dirick Bodeker, mester Henningk, Hinrick Isenberg, Henningk van Bevelten, Hinrick Snerdick, Albert Lodewiges, alle borgere to Hildenßem, bekennen openbar in dussem sulven breve, dat wy samptlig und ein vor alle vor unß und unße erven up flitich erfordernt der frunschop Hinrick Bolen und sunderlig Cord und Johan gebrodere de Bolen, Hinrick Siverdes to Amelgoes, Cord Groteman, Hinrick Koneken, Johan und Cord, Cord de Massim, Hinrick Grotemans to Barckell, Johan Meiger, Olrick Aselmeiger, Tile Peier to Dinckeler und Cord Fickernhagen to Artze wonhaftig sampt one der frunschop sulves vor den genanten Hinrick Bolen und sinen knecht borgen geworden unnd also geloveth, dat wy erstgedachte borgere neffens der frunschop daran willen weßen, dat vakenberorte Hinrick Bole und Hinrick Keißeberg to erst ane jennich behelp und geverde ore itzige gedane lofte, vorplichtinge und ehede holdenn schullen, und wanner de rad unse hernn Hinrick Bolenn und genanten sinen knecht to jenniger tid ineschen und up eins idernn ansprake tor antword, dat were to live, gude, halse und hande ader sustent, fordernn wolden, schullen ße sick wedder instellen und gehorsamligen irschinen ane alle vorbeholdene, exception, intoge ader behelp. Des to forderm orkunde hebbe wy vorgenante Hermen Nolte, Hans Wulffhagen, Henningk Keiserberg, Conrat Perberg, Lodewich Schowarte, Cord Bodeker und Hinrick Snidick und wy frunschop Cord und Johan gebrodere de Bolen, Cord Groteman und Cord Fickernhagen unße rechte ingesegel, pitzer und signete, der wy andern borgen up duth mall mede hirto gebreckes halven unßer eigenn gebrukenn, neden an dussenn breff unser borgetalinge witliken dohn hangenn, dede ys gegeven nach Christi gebort unßers hernn alßo oven geschrevenn.