Wy de radt der stadt to Hyldenßem bekennet openbare in dussem breve, dath vor unß sin ghekomen Metke, naghelaten wedewe Hinrick Oelums, und Tylke Olum ore ßone und bekanden vor seck, ock Bartolth Kallinß, Harmen Wylderlinghes, Hinrick Oydinck und Busse Kucken, vormunderen Barwardt Olumß, der gedachten wedewen ßone, und bekanden van deßsulvesten Barwerdess weghen, dath ße syck myth Hanße Olum berameth, vorelykeneth und vordraghen hebben alßo, dat ße gedachtem Hanße Olum hebben vorlathen und overgheven sineß vaders huess myth aller thobehoringhe, ßo dar to horeth uppe dem Molkenmargkte twischen Corde Knyphove und Hinrick Hardeken woeninghen beleghen, myth pannen und bruwehaws arfflick to hebbende, aver moth dem beschede, dath Hanss Olum vorbenomd der moder und Barwarde ithligem hunderth nyge pund an demsulvesten huße vorschreve wille. Idoch wille de moder ore levedaghe der boeden uppe dem Molkenmarckte frye sunder jennighe tinße vor syck beholden. Wurumme deden vorgenompte wedewe Metke Olum und de vormunderen van Barwerdes weghen vor seck und ore erven desses hußes myth siner thobehoringhe, myth pannen und bruwhaws to Hanss Olums und siner erven hanth eyne rechte ewighe vortycht, darmede to handelen na orem besten, aver unss, unser stad schoth und dingplicht alle jarhe hyrvan to ghevende unghemynret. Und an dussem huse hebbe de broderschup sante Anne hunderth pund, de presentienheren hunderth pund, Dyderick [...]inck hunderth pund und Barwerd Deken vertich pund an pannen und bruwethaws, und yst anderss nicht vorpendet. To eyner forderen orkunde hebben wy unser stad ingezegel ghehenget an dussen breff, na goddes bordt Dusent vyffhunderth an dem achteundetwintigesten jare, des dagheß sancti Remigii. lb lb Deghenhard Kopman, lb Tyle Rikeman.