Wy de radtt der stadt tho Hildeßem bekennen openbar in dussem breve vor uns, unse nakomen unnd alsweme, datt wy unse boden und woninge up dem Eselstige, de ersten boden nogest unser stadtmuren und Borchertt Kolers woninge belegen, mitt alle orer gerechticheitt unnd thobehoringe, so dartho horett, so de itzunder von uns upgerichtett, gemakett und afgeworcht is, hebben vorkofftt Andreas Glesener, Annen siner itzigenn husfruwen unnd Hanse synem sonhen de tidtt orer drier levedage tho bewonende unnd tho gebrukende. Unnd wes gemelte Andreas, syn husfruwe unnd sonhe in vorberorter boden, boven dath wy albereide darinne gebuwet in huse, hove unnd keller und alles anders, buwen, bethern unnd maken werden, ok alles, wes orth- unnd negelfast is, schall in gedachter boden uhnafgebroken nach orer drier afstarvende darinne uhngegulden bliven unnd ahn uns und unße nakomen wedderkomen unnd fallenn anhe weddersprake, argelist unnd geferde, aver unß, unßer stadtt schott und dingplicht allejerliges hirvon tho gevende uhngemynnertt. Und ahn dusser boden hebben wy de rath seven pundt ervetinses und is anders nicht vorpendett. Tho orkunde hebben wy unser stadtt ingesegel witligen gehengtt ahn dussen breiff na goddes borth Veftheinhundertt dreiunndvaftich jar, des mandages na dem sondage Quasimodogeniti.