W. dei gratia sancte Magdeburgensis ecclesie archiepiscopus universis Christi fidelibus presentem litteram inspecturis salutem in omnium salvatore. Noveritis nos domini pape vidisse litteras sub hac forma: Innocentius episcopus, servus servorum dei, dilectis filiis generali ac provincialibus ministris et custodibus ordinis fratrum minorum salutem et apostolicam benedictionem. Celestis amor patrie mentes nostras sic allexisse perspicitur, ut erga hoc solum delectationem nobis tribuat, quod divine voluntati sit placitum ac salutem proferat animarum. Procedit ex hoc, quod nos vestris piis peticionibus favorem benivolum largiri delectantes, maxime cum ex apostolici cura teneamur officii circa religionis augmentum attenti et vigiles invenire, vobis auctoritate presentium indulgemus, ut volentibus vestro aggregari collegio, qui suspensionis aut interdicti vel excommunicationis sententiis sunt ligati, absolutionis beneficium iuxta formam ecclesie imperturi et ipsos in fratres recipere ac eos, qui post assumptum habitum recoluerint se talibus in seculo fuisse sententiis innodatos secundum formam ipsam absolvere valeatis, ita tamen, quod si aliqui ex eisdem huiusmodi sententiis propter debitum sunt astricti, satisfaciant ut tenentur. Nulli ergo omnino hominum liceat, hanc paginam nostre concessionis infringere vel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum. Datum Lugdunum VIII° kalendas februarii pontificatus nostri anno tertio. Quia vero ipsum autenticum cum bulla propter varia pericula non poterat circumferri, presentem litteram sigilli nostri munimine duximus roborandam.