Valentinus dei gratia episcopus Hildesemensis ad perpetuam rei memoriam. Pastoralis officii nostri non minorem partem exequi gratumque deo obsequium tunc exhibere nos credimus, cum bona deo dicata ad uberiora pietatis et divinorum officiorum obsequia transferimus ac pia christifidelium instituta ad dei laudem provide facta in melius reformamus, sane nuper cum per dei providentiam ac ordinationem preter omnem diligentiam nostram, tanquam Aaron, per unanimem et concordem electionem decani et capituli ecclesie Hildesemensis ad ecclesiam et episcopatum eiusdem ecclesie vocati atque electi et per sanctissimum dominum nostrum Paulum papam tertium confirmati, ac post munus consecrationis vigore specialis commissionis eiusdem sanctitatis sue nobis in alma urbe Roma gratiose impensum, etiam a sacra cesarea maiestate serenissimo domino Carolo quinto Romanorum imperatore solita regalia obtinuissemus, et postmodum ad corporalem, realem et actualem eiusdem ecclesie Hildesemensis possessionem (gratia divina nobis assistente) pervenissemus, invenimus eandem ecclesiam nostram Hildesemensem pluribus annis bellis misere divexatam et quassatam, episcopo ac pastore multo tempore destitutam et orbatam, non solum in temporalibus labefactatam imo prorsus collapsam, verum etiam in spiritualibus plurimum deformatam et pene eversam et tam in pontificalibus vicario quam verbi divini predicatore et contionatore et sacre teologie doctore aliisque necessariis officialibus et personis sive quibus res christiana et status ecclesiasticus, presertim hiis periculosis ac tumultuosissimis heresum et pernitiosarum novitatum temporibus diutius conservari non potest destitutam. Porro paulo post familiari domesticaque experientia didicimus ecclesiam ipsam ob temporum malignitatem ad eam tenuitatem imo impossibilitatem, ut predicta onera eidem pro divini cultus decore et conservanda orthodoxa religione a fide incumbentia commode supportare non posset, nisi oportuno illi subventionis remedio succurreretur, perpendimusque quod ipsi ecclesie nostre Hildesemensi illiusque decori ac necessitati plurimum consuleretur, si vicaria ad altare sancte Anne in capella sancte Anne in armario (uff dem fridhoffe vulgariter nuncupata) prope et infra septa ecclesie nostre Hildesemensis situata, que ad collationem, provisionem ac quamlibet aliam dispositionem nostram tamque episcopi Hildesemenses pleno iure spectat et pertinet, mense nostre episcopali pro stipendio et salario seu provisione et competentia nostri in pontificalibus vicarii (qui in teologia doctor seu licentiatus existeret et qui in festivitatibus maioribus inferius designandis officio contionatoris etiam preesse posset) per nos et successores nostros pro tempore assumendi et per sedem apostolicam deputandi ac confirmandi eidem danda et committenda uniretur, annecteretur et incorporaretur, unde ex pastoralis officii nostri debito populo civitatis et diocesis nostre Hildesemensis nobis commisso in sacramentorum administratione, verbi dei predicatione, divini cultus decore atque augmento (quem nostris precipue temporibus ex intimis auctam desideramus affectibus) salutique eiusdem paterne consulere cupientes, vicariam sancte Anne predictam mense nostre episcopali, nobis et successoribus nostris in collatione eiusdem vicarie scienter preiudicantes perpetuis futuris temporibus per presentes unimus, annectimus et incorporamus ac unitam, annexam et incorporatam auctoritate nostra ordinaria cum domo eiusdem ac omnibus aliis et singulis iuribus, fructibus, redditibus, proventibus ac emolumentis suis, ita quod idem in pontificalibus vicarius, etiam caritatum (vulgo der carthaten) panisque et vini cum eisdem caritatibus ecclesie Hildesemensis vicariis dari solitis et consuetis etiam particeps esse debeat, ac eidem vicarie sancte Anne forte annexis et connexis de decani et capituli ecclesie nostre predicte consensu et assensu fore et esse atque debere decernimus, statuentes, volentes et ordinantes, ut quotiens vicariam ad altare sancte Anne predictam deinceps per cessum vel decessum moderni eiusdem possessoris aut alio quovis modo vacare contigerit, nos et successores nostri personam abilem ac idoneam, (que ut premittitur in teologia doctor seu licentiatus existat, et que in festivitatibus maioribus, utpote in nativitatis domini nostri Ihesu Cristi, dominice Palmarum, Iovis sancte, Resurrectionis et Ascensionis dominice, Penthecostes, Corporis Christi, Assumptionis beate Marie virginis, et aliis eiusdem beate virginis in ecclesia nostra Hildesemensis celebribus, dedicationis, Omnium Sanctorum et patronorum festivitatum diebus etiam officio predicatoris seu contionatoris preesse posset) in suffraganeum seu pontificalibus vicarium nostrum pro tempore assumere eidemque pro sustentatione, provisione seu competentia sua vicariam predictam quamdiu officio huiusmodi prefuerit obtinendam, retinendam ac possidendam committere possimus ac debeamus nostrique successores possint et debeant, ita tamen, quod persona in nostrum in pontificalibus vicarium sit designata seu assumpta in nostris et successorum nostrorum manibus solemne iuramentum prestet et iuret, quod officio suo tam in pontificalibus quam sacris contionibus diligenter preesse, quod apud ecclesiam nostram Hildesemensem prefatam in domo dicte vicarie residentiam suam personalem et continuam facere, et quod eandem vicariam, cuius titulum per presentes nostre unionis ac incorporationis litteras supprimimus, extinguimus ac penitus cassimus, nullo unquam tempore sive simpliciter sive ex causa permutationis quacunque, etiam sive apostolica sive ordinaria accedente auctoritate, etiam cum nostro et successorum nostrorum petito ac etiam obtento consensu resignare velit, possit aut debeat, et si eandem personam in suffraganeum seu pontificalibus vicarium pro tempore per nos seu successores nostros assumptam aliquod beneficium ecclesiasticum obtinere contingeret, in quo residere forte maluerit, extunc dictam suppressam et extinctam vicariam sancte Anne seu verius provisionem, salarium vel stipendium ex eiusdem suppresse vicarie fructibus, redditibus ac proventibus in eidem deputatum et constitutum ad manus nostras aut successorum nostrorum libere ac sponte dimittere et resignare debebit, nosque et successores nostros de eodem pro alio suffraganeo assumendo et deputando citra ullum impedimentum libere ordinare ac disponere permittet. Iurabit etiam eadem persona in suffraganeum assumpta seu assumenda, quod contra iuramentum sic prestitum nullam absolutionem seu dispensationem a sede apostolica vel alia quacunque superioritate ecclesiastica seu seculari impetrabit, nec etiam motu proprio eidem concessis aut per alios pro ea forte impetratis seu obtinendis vel impetrandis absolutionibus seu dispensationibus uti velit, proviso tamen, quod unite vicarie predicte onera in celebratione missarum et ministratione chori et aliis supportet, et cultus divinus in ea nullatenus negligatur aut ob id detrimentum aliquod patiatur domusque ac capella ipsa predictis quoad tecta, portas, fenestras et alia in debita structura conserventur. In quorum omnium et singulorum fidem ac robus et testimonium premissorum presentes nostras litteras fieri nostrique sigilli appensione communiri iussimus. Et nos Ludolphus decanus et Otto scholasticus totumque capitulum ecclesie Hildesemensis predicte hec omnia suprascripta de nostris consilio, consensu ac beneplacito facta fuisse et esse processisseque nostro sigillo presentibus etiam impenso attestamur, date in domo seu curia episcopali civitatis nostre Hildesemensis, die vicesimatertia Maii, anno a nativitate domini Millesimo quingentesimo tricesimo nono, pontificatus sanctissimi in Christo patris et domini nostri domini Pauli divina providentia pape tertii anno quinto. Et ego Volpertus Ruschenberch, clericus Maguntine diocesis, sacris apostolica et imperiali auctoritatibus notarius, quia prefate viccarie sancte Anne unioni et incorporationi citatis et vocatis etiam ad hoc per edictum publicum in valvis ecclesie Hildensemensis ut motus est omnibus et singulis interesse habentibus seu habere possidentibus omnibusque aliis et singulis in literis incorporationis et unionis huiusmodi contentis dum sicut premittitur fierent una cum circumspectis et venerabilibus viris dominis Johanne Catzman doctore cancellario, et Hinrico Heineman vicario prefate ecclesie Hildensemensis ac secretario dicti domini episcopi Hildensemensis testibus presens interfui eaque omnia et singula sic fieri vidi et audivi ideoque easdem literas incorporationis subscripsi signoque, nomine et cognomine meis solitis et consuetis unacum prefatorum reverendi domini episcopi et capituli sigillis appensione signavi in fidem et testimonium premissorum rogatus et legitime requisitus etc.