We Hoyer domhere to Hildensem, Borchart, Jan unde Gherard van goddes gnaden greven gheheten van Woldenberghe brodere bekennet unde betughet in desseme openen breve, dat we de dre hove, de beleghen sint up deme velde to Bernten, unde den hof, de de Koldehof het unde ene word in deme dorpe darselves, de we vorleghen hadden, dat os de upghesant unde upghelaten sint van alle den, de dar len eder were eder jenich recht an betalen mochten. Des hebben we endrechtliken dat selve gud mit al deme, dat dar to hort, beyde binnen deme dorpe unde enbuten, gheeghent unde laten Boden van Saldere knapen, hern Cordes sone, unde hebbet vorteghen des gudes unde alles eghendomes unde rechtes, des wi unde use erven eder jement dar an betalen mochte, unde vortyget ewelken des vor uns unde vor unse erven aller naklaghe unde navorderinghe des sulven gudes. Wor ok Bode van Saldere dat vorsprokene gud eghende unde lete to jenegheme goddeshus, dar scolde dat gud bliven unde dat selve goddeshus unde we darmede beleghen worde scolde des gudes mit eghendome unde mit aller brukinghe eweliken gheweret wesen mit alleme rechte, alse wi dat Boden van Saldere gheeghent unde laten hebbet. Velle ok jenich ansprake an dat gud van jemende, de scolde wi afdon, alse ichte we dat gut hedden, dat de der ansprake ane scaden bleve. To eyner eweghen dechtnisse desse dingh entruwen vast to holdende, so hebbe wi unse ingheseghele an dessen bref ghehenghet, na goddes bord Dritteynhundert jar in deme vofteghesten jare, in User Vruwen daghe to Lechtmissen.