Ick Gese Degener, Segers ethwann borger tho Hildessem seliger nachgelathene wedwe, bekenne vor my, Degener Segers minen soinen, mine erven und alßweme ihn crafft dießes brieves, so alße ick van den werdigen hern seniori und canoniken S. Marien Magdalenen capellen alhir tho Hildenßem der sulven capellen hues undt woninge ihn der Schostradten twischen ohrem ock capellenhueße by dem Orde und Hennig Grotesoinen hueße vor my, Degener minen soinen tho twen liven vor driddehalff hundert gulden munte, dre lutke pundtt vor den gulden, koreßwiße gemedett, gelick ßo de brieff my und minen medebenompten van dem gedachten seniori und canoniken gegeven und vorßegelt klarliken uthwißet und meldett, so schall ick und will datsulvige hues unde echterhus in buwe und beteringe holden, wor des nodt und wo vaken des behoiff were. Ick will ock und schall, ok mine medebeschreven, datsulvige hues sulvest bewonen, edder mitt ohrem willen redeliken undt fromen luden vormeden, ock minen naberen nicht tho nha edder tho schaden buwen ahn grunden, wenden, watergengen oder druppenfall, und dem werdigen seniori und canoniken, ock allen ohren nhakomen jarliken darvan geven achtein lutke pundt Hildesemer weringe, de helfte up Michaelis und de andern helfte up Paschen, ock tidtliken vornoigen ahne jennige insage. Beschehe idt aver, dat de twe live alße vorbenompt alle vorstorven - dat godt friste nha sinen gnaden - , alsdenne schall sodan hues und woninge, alße ick und mine medebenompten mit my bewonet hebben und in gehadtt und alle datjenne, dat negelfast ihn dem sulvigen hueße gewest oder were unvorandert unthobroken bliven, mine erven oder jemandes van unßen frunden schullen nha den twen liven ichtwes ahn dem sulvigen hus berechtigen und bereden, ßunder dat vielbenompte hues schal gentzlich, deger und all quidt, frie, ledich und lois wedder fallen und komen ahn de vorgemelten canoniken S. Marien Magdalenen capellen sunder jennigerleie insage, indracht und behelp. Duth love ick Gese Degener, Segers ßeliger nhagelatene wedwe, und Degener Segers min ßone und alle mine medebeschreven ervenn ihn guden truwen strack, stede undt vast tho holdende ßunder jennigerleye argelist, behelp und niefunde dem vielgenandten seniori und canoniken und ohren nhakomen vast und woll tho holdende, hebbe des thor orkunde und wissenheit mines seligen hueshern pitzir ahn dießen reversallbrieff gehangen, und tho mehrer vorwissunge dießer oben geschriebenen dingen hebbe ick de ersamen mine freuntligen veddern und frunde dieße reversall mitt ohren gewondtligen pitzirn tho vorsiegelende gebeten. Und wy Harmen Nolten und Tißeman Kock, borger tho Hildessem, bekennen ihn dießem sulven brieve, dat obgedachte vorhandlung in unßerm byweßen ist volntogen worden, und hebben des tho mehrer tuchniß und warheit ein jeder sin gewondtlige pitzir beneffen der gedachten wedwen hueshern segell wettentlich hirunden by gehangen, jedoch uns und unßern erven ahne schaden. Nach Christi unßers hern gebordt im Vofteinhundersten darnach im vierundseventigsten jare, des mondages in den hilligen Oisternn.