Bartoldus dei et apostolice sedis gratia episcopus Hildesemensis ac administrator Verdensis ecclesiarum universis et singulis dominis prepositis, decanis, archidiaconis, scholasticis, cantoribus, sacristis, tam cathedralium quam collegiatarum canonicis parrochialiumque ecclesiarum rectoribus, plebanis, viceplebanis ceterisque presbiteris, clericis, notariis et tabelionibus publicis omnibusque aliis et singulis christifidelibus utriusque sexus hominibus per civitatem et diocesim nostras ubilibet constitutis, ad quos presentes nostre litere pervenerint, salutem et sinceram in domino caritatem etc. Splendor paterne glorie, que sua mundum illuminat ineffabili claritate pia vota fidelium de clemencia maiestatis ipsius spectantium tunc precipue benigno favore sequitur, cum devota ipsorum humilitas sanctorum precibus et meritis adiuvatur. Cum igitur sicut accepimus per nostros christifideles nostre diocesis nova cappella in transitu Azinorum in honorem sancti Ciriaci et sancte Anne de novo incipiat fabricari, erigi et edificari et non possit absque christifidelium auxilio et consilio consumari, quapropter vos omnes et singulos supradictos christifideles utriusque sexus homines tam spirituales quam seculares, quibus presentes nostre litere presentate fuerint, nobis non subiectis in domino pie exhortamur, nobis vero subiectis mandamus, quatinus, cum huiusmodi mandatum licentiatum lator et omnium presentium dicte cappelle de novo erigende nunctius vel eius in hac parte collega vel socius ad vos vel alterum vestrum pias christifidelium elemosinas petiturus accesserit, ipsum benigne admittetis et humane ac benivole tractare velitis eiusque negotium publice de ambonibus vestris in ecclesiis exponendo, ut populus vester de bonis et rebus ab omnium largitore sibi collatis eidem caritativa subsidia ac pias elemosinas pro cappelle huiusmodi erectione ac pii operis huiusmodi completione dignetur erogare, illa eidem a domino deo omnipotenti ac beate Marie virgini omnibusque sanctis dei recepturum. Nos enim de omnipotentis dei misericordia ac beatorum apostolorum Petri et Pauli auctoritate et ea quam nobis dominus indulsit potestate confisi omnibus vere penitentibus et confessis, qui eisdem ad perficiendum huiusmodi opus predictum manus porrexerint adiutrices quadraginta dies de iniuncta sibi penitentia legitime misericorditer relaxamus, presentibus post biennium minime valituris. Datum anno a nativitate domini Millesimo quadringentesimo nonagesimo secundo, die vero veneris vicesimatercia mensis marcii nostro sub sigillo presentibus impenso.