In nomine sancte et individue trinitatis amen. Universis et singulis dominis abbatibus, prioribus, prepositis, decanis, scolasticis, cantoribus, custodibus, thezaurariis, sacristis, cappellanis ecclesiarum perrochialiumque divinorum rectoribus, plebanis, viceplebanis, altaristis ceterisque presbiteris, notariis et tabellionibus publicis quibuscumque et presertim illi vel illis, ad quem vel ad quos presentes nostre littere pervenerint salutem in domino sempiternam et presentibus fidem indubiam adhibere. Postquam humana conditio ex primi presentis lapsu cecidit in tenebras viciorum, quisque mortalium assidue labitur in culpam et maiori temporis spacio magis peccatorum nexibus religata, ad dissolvendum igitur eorum vincula delictorum cathena constringit precipuum remedium adhibuit humani generis reparator, quo cuiusque peccati dissolvitur vinculum et ymago deperdita recuperatur, hoc velut sacre scripture stilus spiritu sancto demonstrante describit, elemosina est, que lavat, mundificat, abstergit et abolet omnia criminalia et venialia peccata, quibus humana conditio iugiter sordidatur. Ipsa namque celebrius commendatur et sollempnioribus preconibus commendata excellere dinoscitur, quelibet agmina pietatum per illam namque sit ablucio peccatorum et contra omnia pericula firmum fundamentum. Hec est illa preambula suffragatrix, que nos excusat propiciabiliter de commissis et restituit nobis gratiam plasmatoris, cuius benivolencie fuimus per originale peccatum expertes, cuius gloria fuimus per voluntaria peccata post plasmatoris gratiam et baptismatis undam privati. Cum igitur ex prime contagionis vicio iugiter dilabimur in culpam, necesse est, ut nostra peccata elemosinarum largitionibus diluamus ac mediantibus ipsis ad patriam, que est celestis Jherusalem, reverti mereamur. Cum ergo inter pietatis opera illud permaxime afficitur in receptorum oportunitatibus per manus ortodoxorum ac cristicolarum auxiliatrices congrue ac honorifice ad laudem et gloriam omnipotentis dei sueque gloriosissime virginis Marie et beatissime matris eiusdem Anne necnon beati Ciriaci martiris ac sociorum eius patronorum prefate ecclesie ac tociusque celestis curie, hinc est, quod nos subscripti sollicitatores huius nove ecclesie prope et extra muros Hildesemenses Tyle Meyger, Hans Rype, Hinrick Spare unde Hinrick Westfall, oldermanni antedicte ecclesie, que defectum in suis edificiis, structuris, libris, sacris vestibus, calicibus, monstrantiis, campanis et aliis ornamentis ad divina officia celebranda requisitis, et quia proprie facultates ecclesie ipsius, quia exiles nimis et debiles, non suppetunt, idcirco vestris et aliorum christifidelium pro ipsius ecclesie constructione elemosinis indiget adiuvari, quare vos omnes et singulos in domino nostro Jhesu Christo exhortamur humilique prece sitibunde supplicamus, quatinus discretum et honestum virum Hinricum Gronouwen, dicte nostre ecclesie iuratum cum suis sociis, presentium ostensorem, cum ad vos seu alter vestrum presentibus nostris sigillis nostris roboratis et munitis christifidelium ac parrochianorum vestrorum elemosinas pias grataque eorum subsidia ad premissa petituri pervenerint, indulgentias subscriptas omnibus namque adiutrices ad prefate nostre ecclesie pro reedificatione ac prefatorum necessariorum comparatione porrigentibus a domino nostro domino Bartoldo episcopo Hildesemensi ac administratori Verdensi quadraginta dies indulgentiarum sunt concesse. Insuper petimus, ut nostrum nuntium iuratum cum sociis suis, presencium ostensorem, benivole absque alicuius munere exaccione elemosinas pias vestris in ecclesiis et parrochiis etiam hostiatim petere atque colligere admittatis, eosque erga vestros parrochianos diligenter promovendo fideliterque eos exhortando, ut eidem nostro nuncio cum sociis suis ad prefate nostre ecclesie edificationem et inibi ornamentorum ad divinum occultum spectantiorum manus porrigant adiutrices, ut per hec et alia pietatis opera, que domino inspirante fecerint, valeant hic a malis protegi et in celesti patria in inarcessibilis glorie corone, in qua iusti sicut sol fulgebunt in regno patris eorum mereantur feliciter coronari. Insuper quicumque hominum elemosinas ad structuram predictam vel ad inibi ornamenta pie porrexerint aurum sive argentum integrum vel fractum ad calices vel ad monstrancias, mensalia, manutergia sive pepla ad altaria ponenda, erunt participes fraternitatis beate Marie virginis, que in ecclesia nostra quatuor temporibus anni celebrabitur, necnon omnium missarum, que inibi perangantur, in quibus missis rogabitur pro omnibus nostris benefactoribus. In quorum omnium et singulorum premissorum fidem, robur evidensque testimonium in nostris literis contentorum sigillum nostre ecclesie est appensum. Datum a nativitate domini anno Millesimo quadringentesimo nonagesimo secundo, ipso die beate Marie Magdalene.