In dem namen der hilgen Drevoldicheyt amen. Dem almechtigen godde, Marien syner benedieden leven moder und alle godes hilgen to love und ere, ock allen cristen zelen to troste goddesdenst mher to vormerende unde vort to settende, mydt vulbort, wettent unde willen des erwerdigen in godt vaders unde hernn, hernn Bartoldes bisscoppes to Hildesem, ock vorstender der kercken to Verden, unses gnedigen leven hernn, des werdigen hernn Henningk Holleman, deken unde perners sunte Andreas kercken bynnen Hildesem, hebben wy her Hermen Linthorst canonick unde her Johan Wylde vicaries der ghedachten kercken sunte Andreß, her Hermen Backhusen, kerckher to Bothmer, unde Hans Teygeler, borger to Hildesem, zeliger hernn Johan Janß testamentarien nha lude, inholde unde medebringinghe synes latsten willen unde testamentes, syner, ock syner vorelderen unde allen anderen cristen zelen to hulpe unde troste eyne nye conmissien in der cappellen sunte Ciriacus uppe dem Ezelstige vor Hildensem belegen mydt eyneme nyen altare an dem koere midden in der capellen in de ere goddes, Marien syner leven moder, alle godes hilgen, der leven hilgen patronen sunte Goderdes, sunte Barwerdes, sunte Mauwerisies, Cosme, Damiani, unde der hilgen junckfrouwen sunte Gertrude angherichtet, ghemaket unde gestifftiget, ock jegenwordigen anrichten, maken unde stifften in macht desses breves myt derdehalff hundert nyen punden hovetgeldes, uppe viffteyn lutke punt jarliker ewiger renthe by dem ersamen rade von Hildesem belecht, na lude der vorsegelden breve darover gegeven unde vorsegelt, begifftiget unde toghekert hebben. To welkore conmissien eck her Hermen Linthorst canoneck vorgenant uth sundergher innicheyt gode von hymmelrike, Marien syner benedieden leven moder, allem hymmelschen her to ere, ock umme myner unde myner vorelderen unde alle myner frunde zelen trost unde salicheyde myn huß belegen bynnen Hildesem uppe dem kerckhove to sunten Andreße by der straten, dar man geyt uppe dath nyewerck negest Ilzebee Hollemans huse, mydt hundert lutke punden hovetgeldes mynes egen geldes uppe viff punt jarliker rente by dem ersamen rade to Bokenem, ock negen marck sulvers an Henningk Cramers huse bynnen Hildesem tegen der Helle uppe dem Oldenmarckede uppe twe punt Peynsscher penninghe jarliker rente, unde achteundevertich punt am lande to Sende belegen, welck gifft veer molder hardes korns, roggen unde garsten, nha lude der breve darover vorsegelt unde gegeven, togekert unde gegeven hebbe, ock jegenwordigen in macht desses breves tokere unde geve, so dath ius patronatus effte de lenwar desser conmissien de wyle ick leve by my schal bliven, unde wyl de vor my beholden, ock jegenwordigen beholde, unde de conmissien so langhe meck dath belevet sulves wyl besitten. Kemet averst, dath eck sodann conmissien vorlete offte mydt weme permuterde unde de selfftige vor my dodes wegen vorfelde - dath godt schicke nha synen gotliken gnaden - , denn schollen de olderlude desser cappellen tortit my weddernemhen to desser conmissien unde dem gedachten hernn deken offte dem oldesten canonico der genanten sunte Andreß kercken in des deken affwesende nemen unde presenteren, by welkorem deken offte oldesten canonico in affwesende des dekens de overicheyt to bestedigende unde investierende ewich wesen schal unde blyven, unde denn so vordan de wile ick leve dath ius presentandi wyl beholden. Wen eck averst - dath godt schicke nha synem gotliken willen - dodes halven byn vorfalen, so schal furder to ewigen tiden de upgemelte lenwar unde dath ius patronatus bliven by den erghedachten olderluden desser cappellen sunte Ciriakes. Deselfftigen schulen vordan der overicheyt ghebruken, unde de wyle eyn van zeliger myner suster kyndernn der Wagenfoerschen, zeliger Hermen Vagenforß fruwe, uppe der Nyenstad vor Hildesem offte myner suster dochter kynder, dede nhu hefft Helmeken Marwede den smedt uppe dem Berge vor Hildesem, de wyle eyn von den unde eyn von ohr vordan de wile de slechte warendede, bequeme darto sy, ock echt gheboren, unde ifft ick van dodes wegen vorfelde, denne int erste Johannes Marwede, desser myner suster dochter kynde, Helmeken sonen, unde furder nha syneme dode eynem andernn von dessenn slechten, eyn mal von den vicare, dath ander dem werdigen hernn deken sunte Andreß tortit offte dem oldesten canonico darsulves in affwesende des dekens nha vorscrevener wyse in verteyndaghen nhemen unde presenteren, unde ifft jenighe wedderspragk offte twiflinge mangk den upgemelten olderlude erwosse unde desse conmissie in verteyndaghen nicht vorlent worde eneme von desseme slechte offte underghescreven, denn schal de deken tortit unde dath gantze capittel to sunte Andreß eynen von den vorgenanten myner suster offte suster dochter kindern, wem dath gheboret, nemen unde mydt der conmissien bestedigen unde belenen, dath se in der selfftigen wise ock mydt dessen undergescrevenen scholen holden. Furder weret ock, dath desser myner suster unde suster dochter kynder neyn nicht so danich were, im jare prester to werdende, denn schollen ore elderen offte de olderlude desser capellen von den upkomeden desser conmissien holden eynen officianten, so lange deselfftigen to oren jaren komen. Denn schullen de sunder jenich vortoch offte vorhinder ore wyinghe nhemen unde prester darup werden. Wan averst dusse slechte dodes halven gantzs vorlediget syn unde uth den slechten neyn mher levet, so schulen desse olderlude vordan to ewigen tiden dem ghedachten hernn deken tortit offte in synem affwesende dem oldesten canonico nha vorscrevener wiße den oldesten kor[st]holre desser gemelten kercken sunte Andreß, de bequemest darto sy im jare prester to werdende unde anders nhemende, in verteyndaghe so vorberort is in alre wise nhemen unde presenteren, welkor schal vorplichtiget syn, ock sick darnha schicke unde eyn juwelk von dessen mynen frunden vorgescreven gode almechtich to denende unde alle weken veer missen to lesende, tom ersten eyne selemisse alle weken vor zeliger her Johan Janß, alle syner frunde, ock mynen unde myner frunde unde voreldern mydt andernn elenden zelen to biddende unde to gedenckende, de andernn in de ere des hilgen apostels sunte Andreß mydt eynen suffragio von sunte Mauricies, de dridden in de ere der hilgen patronen sunte Goderdes, sunte Barwerdes mydt eynen suffragio der hilgen arsten Cosme unde Damiani, de verden von unser Leven Frouwen mydt eynen suffragio von sunte Gertrude. Ifft frome minschen uth innicheyt ores herten gelt opperden uppe dath altar, dath schal de conmissaries desser conmissien tortit dem werdigen hernn deken tortit vorgenant nha gheborliker wise in syn hus bringen unde dem deken horsam doen. Weret ock, dath frome lude desse conmissien mydt mherem gelde wolden vorbeteren, schal de conmissaries tortit sick geborliken darann schicken. Vortmer ifft dessen ghedachten olderluden in tokomeden tiden eyn bequeme huß dar up dem Eselstige belegen to kope vorkeme, denn schollen de selfftigen de macht hebben, duth vorscreven huß bynnen Hildesem to vorkopende unde sodann mydt dem gelde wedderumme by de conmissien kopen, dar de conmissaries by onhe uppe dem Eselstighe personliken schal inne wonen unde desse conmissien in erem godesdenste waren. Ock wen sick begifft, dath duth upgemelte hovetgelt mydt den bedageden rente sampt offte besundern worde uthgheloset, denn schollen desse ghedachte olderlude sodann gelt leggen in de gerwekamern to sunte Drese, ock de conmissarius tortit, unde dath mydt den ersten, wen se konnen, mydt wettende des dekens unde gantzen capittels sunte Andreß beleggen. Welke breve darover ghemaket, schollen se in vorwaringe leggen by des capittels breve. Wy Bartolt von godes gnaden bisscopp to Hildesem unde vorstender der kercken to Verden bekennen openbar in dessem breve, dath alle artikele desser fundacien mydt unsem willen, vulborde unde beraden mode gheschen syn, ghehandelt unde gemaket, dath wy in aller formen, wiße unde mathe so vorgescreven is von unser geordender walt unde macht wegen bestedigen, bevestigen unde confirmeren, so uns sampt unde besundern gheboret. Wy bewillet ock unde beholdet dem upgemelten hernn Hermen Linthorst canonicke unde den vorscrevenen olderluden desser capellen de lenwar gheheten ius patronatus offte ius presentandi der vorscrevenen wiße unde conmissien, so he dath beholden hefft. Des to mherer irkantnisse hebben wy unse inghesegel heten hengen neden an dessen breff, unde ick Henningk Holleman, deken unde perner der ergenanten kercken sancti Andree bynnen Hildesem bekenne openbar in desseme breve vor my unde myne nhakomelinge, dath alle dusse vorscrevenen artikele unde stucke mydt mynem willen unde vulborde ghescheen syn, unde des to furder irkantnisse hebbe ick by mynes gnedigen hernn von Hildesem ingesegel myn ingesegel na ghebor witliken ghehenget heten, dede gegeven is unde gescreven im jare Dusent viffteynhundert am stillen fridaghe in der hilgen Vasten.