Ek Cord Bock knape bekenne openbar in dussem breve vor mek, myne erven unde vor alßweme, dat ik upgebord hebbe unde entfangen vaftich gude vulwichtige Rinsche gulden van hern Hinrick Cramer, vicarius der vicarie to dem altar des Hilgen Cruces in der capellen sancti Ciriaci up dem Ezelstige, de denne vormals legen by dem kloster sancti Michaelis bynnen Hildesem, unde darna worden afgegeven unde de werdige her hern Heningk Jarmerket, domher de kerken wandages to Hildesem, nam up synen hoff, den nu tortid bewonet hern Andreas Lochaw, ok domher, de se ok hefft afgegeven. Sodanne vaftich gulden hebbe ik vord gekard in myne unde myner erven nuth unde fromen. Hirvor hebbe ik dem genanten her Hinrick Cramer unde nakomelinge in der genanten vicarie vorkofft unde vorkope jegenwordigen in crafft dusses breves sesteyn schepel hardes kornes, nomeliken achte schepel roggen unde achte schepel garsten uthe mynem meygerhove to Wulvinge gheheten de Tornehoff mit sesß hove landes tegetfry, den nu to dusser tyd buwet unde fruchtiget Bartolt Lutcherdinges, beredeliken to gevende twischen Michaelis unde sunte Martens dage to betalende. Weret ok sake, dat de sulve meyger an sodaner betalinge wu boven beroret sumich worde, so mach de genante her Hinrick, syne medebescreven sodann gudes undermathen, den hoff bemeygeren mit eynem andern meyger mit mynem effte myner erven willen, de sodann betalinge nochafftich dede dem genanten her Hinricke, synen medebescreven effe volger in der genanten vicarie. Weret ok sake, dat sodan meygerhoff ansprake mit rechte lede - des ik hope nicht scheyn schal - , in dem valle so vorscrive ek Cord Bock vorgenant dem genanten her Hinrik, synen medebescreven uth alle mynen redesten gudern unde upkomen sodan sesteyn schepel kornes beredeliken to gevende uppe tid vor vormerket. Forder so hebbe ik Cord Bock vor my, myne erven de macht beholden, dat ik sodan sesteyn schepel kornes mach alle jar wedder afkopen mit sodan vaftich gulden, dat ik dem genanten her Hinrick Cramer effte myne erven de losekundige don in den veer hilgen dagen to Winachten unde denne darna in den veer hilgen dagen to Paschen erstvolgende vul unde al vornogen unde betalen in der stad to Hildesem umbekummerd geystlikes effte wertlikes rechtes sunder vortoch effte hinder. Dez to eynem teken der warheyt hebbe ik Cord Bock vilgenant dussen breff vorsegelt vor mek, myne erven mit mynem rechten ingesegel in guden truwen wol to holdende. Unde ik Bartolt Bock knape bekenne under mynem ingesegel, dat en sodan ghescheyn mit mynem willen unde fulborde, unde hebbe des ok myn ingesegel ghehenget an dussen breff, de gegeven yß na der ghebord Christi unses hern Dusent wiffhundert dar an dem sesteynde jar, in dem hilgen Paschen.