Wy Tzieke nalatene husfrowe Hermen Ernstes zeligher, Ilsebe ichteswanne husfrowe dusses sulven Hermen Ernstes, Greteke Middesborges bekennet openbare in dussem breve unde don witlick alle denjennen, de on seen, horen edder lesen, dat wy gode van hymmele, Marien siner leven moder unde allem hymmelschen heyre to eeren, allen cristen zelen, unsen elderen unde alle, de uth unsen slechte vorstorven sint to hulpe unde to troste hebben ghefunderet unde ghestiftet, funderen unde stiften eyne nyge vicarie to deme altare sunte Katherinen in der capellen sunte Katherinen buten Hildensem, unde dat altare iß belegen in deme middelle dersulven cappellen, in de eere sunte Katherinen, mid seven punden luttiker munte alßo to Hildensem gemeynliken gande iß, welke seven pund sint belecht by de sworen unde olderlude dersulven cappellen sunte Katherinen ewichliken to blivende. Vortmer heft dusse sulven vicarie beghiftighet Gherdrud nalatenne husfrowe Hermen Remensniders zeliger mid twenundedrittich schilling luttiker munte, ok by dussen erbenomden olderluden der cappellen sunte Katherinen. Ok heft hirto ghegheven de Friwarkessche twe nige pund pennige ewighe renthe by dusser vicarie to blivende, welke twe nige pund de vicaries, de darmede belenet iß, mach manen van dussen vorghescreven olderluden dusser cappellen sunte Katherinen. Vordmer heft hirto ghegheven Ludeke Hermelinghes, Alheyt sin suster eyn pund jarlike renthe, welk pund de vicaries mach upboren van dussen erbenomden olderluden sunte Katherinen na inholde der breve, de darvan dussen erbenomden olderluden sunte Katherinen over vorsegeld sint. Welke gulde unde renthe also vorscreven is de vicaries, de darmede belenet iß van dusser erbenanten Tzieken nalatenne Hermen Ernstes weghen, van dussen erbenomden olderluden sunte Katherinen upboren mach unde in sine nuth keren unde godde dar flitiken aff to deynende unde bidden vor alle derjenner zele, de dusse vicarie ghestiftet unde funderet hebben unde de uth oren slechten vorstorven sint, unde schal vorplichtet wesen, alle wekenne to veer missen to donde vor dussem erbenanten altare sunte Katherinen: de erste schal wesen van der hilgen Drevoldicheyt, de andere vor alle cristenne zele, de dridde van deme Hilghen Cruce, de verden van Unser Leven Frowen, yd enwere, dat sunderike festa kemen, dar he van lesen wolde, de macht schal by ome stan. Ok wan komen de vertyde, also Winachten, Paschen, Pinxsten, des Hilgen Licham dach, Visitationis Marie unde de achte daghe uth, so mach he lesen van den festen also se komen. Unde dusse sulve vicaries, de mit dusser vicarie belenet is, schal dusse vorscreven missen sulven don, yd enwere, dat ome echte nod beneme, unde enschal ok anders neyn leyn hebben. Win, oblaten, lechte, kole schullen ome schaffen de olderlude sunte Katherinen, unde schal neymede vorplichtiget sin edder wesen, id ensi, dat he don wille unde schal antworden dat offertorium, deme dat boren mach. Ok schal he don obediencien dem dekenne to sunte Andreas bynnen Hildensem. Wan aver dusse erbenante Tzieke Ernstes vorvallen iß van dodes weghen, so schullen de olderlude sunte Katherinen dusse erscrevene vicarie lenen eynem armen prestere edder scholere, de in eynem jare prester werde. Ok schal de vicaries dusses altares sine vicarie nicht vorbuten unde sine missen sulven don; scheghe des nicht, so moghen de olderlude de macht hebben, one darumme to beschuldende, to vorvolghende vor sinem dekenne vorscreven. Ok scal de vicaries helpen manen alle dusse vorscrevene renthe, ift des not iß. Dusses to bekantnisse hebbe ek Tzieke Ernstes vorscreven myn ingesegel henghet an dussen breff, des wy anderen alle bruken. Unde wy Ernestus van godes gnaden bisschop to Hildensem bekennet openbare in dussem breve vor uns unde unse nakomelinghe, dat sodan stiftnisse, beghiftnisse unde alle andere stucke unde articuli dusses breves mit unsem willen ghescheyn sin, unde wy bestedighen se van unser macht weghen, also wy eyn bisschop des stichtes to Hildensem sin unde hebben des to bekantnisse unser ingesegel tovoren heten henghen an dussen breff. Und ek Hinrick Sanckenstede, deken unde perner der kerken sunte Andreas bynnen Hildensem bekenne openbare in dussem sulven breve vor mek unde myne nakomelinge unde alsweme, dat alle dusse vorscreven stucke unde articule dusses breves mit mynem goden willen unde vulborde ghescheyn sin, unde hebbe dusses to bekantnisse myn ingesegel ghehenghet an dussen breff, de gheven iß na der bord Christi unses heren Dusent verhundert darna in deme sesseundesestighesten jare, ame dagh sunte Andreas des hilghen appostels. lb lb Auschultata et collationata est presens copia per me Johann Geffordes de Borcholte, imperiali auctoritate notarius, est concordans cum eius origenali, quod protestor manu propria.