Wy mester, olderlude unde gemeynen werken der knokenhauwere des groten markes bynnen Hildensem bekenne openbare in dusseme breve vor uns unde unse nakomelinge, so alze de ersame vruwe Helewich, nagelaten weddewe Luder Dommeygers zeliger, by uns hefft gelecht eyne benomde summe geldes uppe itlike jarige tynse, de na oreme dode to kerende na orer begheringe na uthwisinge des breves, den wy darup gegeven unde vorsegelt hebben unde to truwer hand is gelecht by dat cappittele to sunte Andres, desulve breffe denne manck anderen artikelen inneholt, dat wy den armen zekin luden vor der Nyenstad allejarlikes uppe de uthgande Meyneweken schullen geven dritteyn schillingh unde veer penningh nyer Hildensemscher pennighe, also vorplichtige wy uns in unde myt dusseme breve, dat wy den vorbenomden armen zekin luden vor der Nyenstad na dode der vorbenomden Helewige allejarlikes uppe de vorgescrevene tyd uthgande Mentweken willen geven unde enthrichten dritteyn schillingh unde veer pennigh der vorgescrevenen nyen penningh, welk gelt one schullen delen unde geven ore olderlude unde hovemester, deme eynen sovele alze deme anderen. Doch so schal de hovemester daraff tovoren hebben vor sin arbeyt achte nige penningh dersulven nyen pennighe. Dusses to tuge der warheyt hebben wy unser warken ingesegel an dussen breff hengt, na goddes bort Verteynhundert darna in deme sevenundesestigesten, des mandages na Mydfasten.