Wy mester, olderlude unde gemeynen warken der knokenhauwere des groten markedes bynnen Hildensem bekennen openbare in dusseme breve vor uns unde unse nakomelinge, so alse de ersame vruwe Heylewich, nagelaten wedewe Luder Dommeygers zeliger, by uns hefft belecht eyne benomde summen goldes uppe itlike jarige tinße, de na oreme dode to kerende na orer begheringe na uthwisinge des breves, den wy darup gegeven unde vorsegelt hebben unde to truwer hand is gelecht by dat capittel to sunte Andreaß, desulve breff denne mangk anderen artikelen inneholt, dat wy den armen zeken luden vor der Nygenstad allejarlikes uppe de uthgande Meyneweken schullen geven dritteyn schilling unde ver penninge nyer Hildensemschen penninge, also vorplichte wy uns in unde myt dusseme breve, dat wy den vorbenomden armen zeken luden vor der Nygenstad na dode der vorbenomden Heylewige allejarlikes uppe de vorscrevene tyd uthgande Meyneweken willen geven unde entrichten dritteyn schillinge unde ver penninge der vorscrevenen nyen penninge, welk gelt one schullen delen unde geven ore olderlude unde hovemester, deme eynen sovele alse deme anderen. Doch so schal de hovemester daraff tovoren hebben vor sin arbeyd achte nye penninge dersulven nyen penninge. Dusses to tuge der warheyt hebben wy unser warken ingesegel an dussen breff hengt, na goddes bord Verteynhundert jar darna in deme sevenundesestigesten jare, des mandages na Mydvasten.