We de rad der stad to Hildensem bekennet unde betuget openbare, dat vor uns quam Hinrick van Verden unde bekande, dat he an sinem huße unde woninge mit aller tobehoringe alße darto hort in deme Hagen twischen Hinrick Remmerdes unde Eggert Loppenstede woninge belegen vor vyveundevertich gude Rinsche gulden hebbe vorkofft dre gulden dessulven goldes edder vor jo den gulden sestein schillinge pennige unser nyen pennige jarlikes tinßes deme mester, olderluden unde gemeynen werken der knokenhauwere des groten markedes unde oren nakomen den tinß alle jar beredeliken to gevende, de helffte uppe sunte Michaeles dach unde de anderen helffte uppe Paschen. Aver Hinrick van Verden vorbenomt hefft sek, sinen erven unde deme besittere sines vorschreven hußes unde woninge de macht unde willekore allene beholden, alse dat se allejarlikes twischen den hochtyden Winachten unde Lechtmissen deme mester unde olderluden der knokenhauwere vorbenomt de lose dusses benomden tinßes kundigen moget, unde welkes jares dat schude, denne darna to deme neisten tokomende Paschen sint de erbenomden Hinrick van Verden, sine erven unde de besitter sines vorschreven hußes unde woninge den erbenomden tinß vor viveundevertich gude Rinsche gulden edder vor jo den gulden sestein schillinge pennige der vorschreven nyen pennige van deme mester, olderluden der knokenhauwere vorbenomd unde van oren nakomen plichtich wedertokopende unde one darmede uppe de sulven tyd den vorschuldenen tinß unde ifft one wes vore an deme tinße ichtes enbroken unde entseten were to gevende sunder wedersprake, aver uns unser stadschot unde dingplicht alle jar darvan to gevende ungemynret. Unde an deme sulven huse hebben de heren to sunte Michaele achtein pennige ervetinses unde Kerstianus kindere twehundert punt hovetgeldes umme tein punt tinßes. To bekantnisse dusser stugke hebbe wy unser stad ingesegel an dussen breff hengt, na godes gebort Verteinhundert jar darna in deme negenundesestigesten jare, ame mandage na Misericordia domini. lb Tile Hovel, lb Hinrick van Alten.