Ek Lodewich van Veltem, saliger Hinrikes soen, bekenne openbar vor my unde alle denjenen, de dussen breeff seen eder horen lesen, so alße ek, nü tor tyd besitter des slottes to Wintzenborch, na anherdunghe der büre to Segeste upgesath unde angeslaghen hadde unde don bekummeren den tegeden darsulvest to Segeste belegen mynem genedigen heren van Hildensem to vorderinge synes schatgeldes van lantbede wegen, welke tegede behorich iß den ynnigen heren unde broderen in der congregatien vor Hildensem in deme Brüle, unde se my sodanen kummer nicht tostadet hebben, isß um vorblyff sodane sake vor unsen genedigen heren van Hildensem, biscop Bertelde, van beyer parte wegen, so dat billiken unde borlike was, beseen unde vorhandelt. So denne unse genedige here vorbenompt den vorbescrevenen heren vor recht tovonden unde tobescheyden hefft den eergenanten tegeden myt deme hüse unde al syner tobehoringe sodaner besweringe fry unde losß to blivende, byn ek des ok so tovreden unde segge den sulven heren unde broderen to in guden truwen unde vruntschop in dusser jegenwordigen scrifft sodane toschedent ordel unde recht vast unde ungehindert to holdene, so dat de sulven heren van sodanem tegeden, huß unde tobehoringen guderen des sulven tegeden van my effte nemant van myner wegen noch ok den buren to Segeste noch dem slotte to Winsenborch jergent ynne vorplichtiget schullen wesen alse schattinge, plicht eder denst darvan to gevende efte to donde, unde vorlate on des gensliken myt gudem willen alse mynen bysunderen guden fründen. Vorder dat se god den heren vor my unde de myne truweliken bidden, vordene ek gerne jegen se, se to beschermen unde to vorderen, war se myner to behoff hebben. Des to vorder bekentnisse hebbe ek mynen ingesegel drukket up spacium dusses breves, na der bort godes Dusent veerhundert unde negentich, des mydwekens na Quasimodogeniti, up unser borch to Winsenborch in jegenwordicheyt der erwerdigen domheren her Dirik van der Schulenborch, her Büno unde Lulef van Veltem mynes vederen.