Wy mester und olderlude und ganttzen ghemeinen warcken der beckere bynnen Hyldensem bekennet openbare in dussem breve vor uns, unße nakomen und alsweme, dath wy vann der nagelaten wedewen Bartolth Molen zeliger hunderth nyge pund, so tho Hildensem ghewonthligen ghynghe und gheve sin, upgenomen und entfangen hebben und de forth in unses ampttes nuth, besten unde fromen wythligen gekarth, wur vore wy der gemelten wedewen, oren erven edder deme holder dusses breves mith orem guden wyllen uth unseß ampttes renthen und redesten upkomen hebben vorkoft und vorkopen in macht dusses breves veer pund des sulven nygen gheldes jarliges tinses, de wy onhe und unße nakomen alle jare plichtich sin to ghevende, de helfte uppe Paschen und de anderen helfte uppe sunte Mychaelis dagh beredeligen alle tyd. Doch hebben wy uns und unsen nakomen de macht beholden, alse dath wy und unße nakomen alle jare dussen vorgetekenden tins wedder affkopen moghen, und welkes jares wy deß geneget, wyllen wy der gedachten wedewen und oren medegesechten deß de loße tovorn twischen sunte Johannis daghe tho Myddensommere und Unser Leven Fruwen daghe Kruthwiginge vorkundigen, und welkes jars dath schude, denne darna tho deme nogestfolgende sunte Mychaelis daghe sin wy und unße nakomen van unses amptteß weghen sodann vorgetekende hunderth nyge pund wu vorgeschreven myth allen bedagheden vorßeten tynsen, ift der noch ichteswelke hynderstellich umbetalth weren, in eynem hope gentsligen vornoghen und betalen sunder jennigherleye arghelist, hynder, vortoch ifte insaghe. Deß tho forderem bewyße und orkunde hebben wy unses ampttes ingezegell gehenget an dussen breff, na goddes borth Vefteinhunderth in deme eynundtwintigesten jare, dinxsdages post Bartholomei apostoli.