We de rad der Nigenstad vor Hildensem bekennet openbare in dussem breve, dat wy hebben entfangen van unsem kerkheren hern Bernde Cocii sesteyn punt penninghe olt, der achte nige Hildensemsche penninge eynen schillink geldet, dar wy hebben uns vor vorplichtiget unde vorplichtigen in craft dusses breves, dat wy schullen unde willen utgeven uppe den dach, wanner me begeyt myd vigilien unde zelemissen des erbaren unses kerkhern unde siner vrund zele, des achten daghes na sunte Mertens dage, eyn punt penninghe ewiger gulde des vorscrevenen gelldes, unde dat delen unde geven in dusser nabescreven wise: wanner de begenknisse schud so vorghescreven is, so wille wy geven unsem kerkhern in unser kerken twe schillinghe vor de vigilie unde zelemissen, unde geven ok dem kerkhern vere schillinge vor de memorien, dar he hern Berndes Cocii unses kerkhern zele unde siner frunde zele vor denke dat jar over unde geven dem cappellane eynen schillink unde dem altristen unde vicario sunte Mertens altars ses penninghe unde dem oppermanne VI d. Unde we dar nicht enwere to der vigilien unde zelemissen, dem enscholde me nicht gheven. Unde ok schulle we de rad tugen eyn lecht van eynem halven pund wasses, dat dar barne to der vigilien unde zelemissen. Unde we de rad meynliken schullen to der selemissen to offer gan, hirvor schalle de sittende rad sek unde dem narade vor geven eynem jowelken to siner presencien ses penninghe der vorscrevenen weringhe, unde we dar nicht enkumpt unde offert to der zelemissen, dem schalme nicht geven. Unde wes dare overich bleve, dat schal me holden unde hebben to hulpe dem lechte. To bekantnisse dusser vorghescreven stucke hebbe we de rad erbenomt unser stad ingesegele neden an dussen breff ghehenget, na godes bord Verteynhundert jar darna in deme achteundevertigesten jare, des dinsdages na dem dage Johannis ante portam.