Ick Hans Ule, nu tor tyd voget uppe der Nygenstad vor Hildensem des eddelen, wolgeboren heren, eren Hinrickes graven to Swartzeborch, Sunnderhusen unde Arndstad, domprovest to Hildensem, bekenne openbare in dussem breve under mynem ingesegel, dat vor meck, dar ick sath in gehegedem richte to rechter dingktid daghes, quam Dilige Pickerdes unde openbarde, wu de rad der Nigenstad vor Hildensem se gegrepen hadde umme schulde willen, de se to ore hadden, unde se darumme in ore hechte gesath hadden. Der sake halven hefft se sick myt deme vorbenomden rade wol vordragen, so dat se ohnne danckede, wente se umme groter flitiger bede willen orer frunde se quid, ledich unde los gelaten hebben. Hirumme so lovede de vorbenomde Dilige Pickerdes unde or man noch van orentwegen myt oren guden frigen willen, unbedwungen unde myt wolberadenem mode eynne rechte orveyde to holdende unde sworen dat myt oren liffliken fingeren, stove des eydes to gode unde allen synen hilgen, dat se noch he edder van orer kinder wegen unsen heren den domprovest unde den rad der Nygenstad unde alle de ore unde alle ore borgere unde alle, de ohne tostan to vordegedingen unde ock nicht wil entegen wesen tegen den rad to Alvelde unde alle, de ohnne tostan to vordegedingende, umme sodan sake willen nicht bedegedingen, anclagen, anlangen schullen edder enwillen nummer to ewigen tyden myt gerichte edder ungerichte noch hemeliche noch openbar neynerleyewis, wu men dat benomen konde bynnen edder buten landes, myt worden edder myt werken, de sake to forende dorch seck sulvest edder eynen anderen, ock nicht bestellen laten, se alle edder besunderen darumme bedegedinget laten edder anlanget werden ane alle gheverde, unde se unde or man tegen unse heren den domprovest unde den rad unde de ore vorbenomd nicht tegen synn wille de wile se levent. Alle dusse vorgescreven unde nabescreven artikel unde stucke sampt unde besunderen loveth unde sweret de vorbenomde Dilige Pickerdes unde Bernd or man vor orer kinder mede myt oren liffliken fingeren to gode unde alle synen hilgen stede unde vast unde unvorbroken wol to holdende ane alle list, behelp unde geverde. Unde se edder he van orer wegen enwillen sick nicht van sodan eyden nummermer laten losen, ock neyne dispensacione edder absolucien krigen edder fragen laten noch van pewessen edder keyseren edder neynen heren geistlik edder wertlick, nenerleyewis list edder geverde darto bruken. To merer bekantenisse unde wissenheit dusse orveyde to holdende in alle oren puncten unde artikelen, so hefft de vorbenomden Dilige Pickerdes unde Bernd Pickerdes dusse nabescreven fromen lude, ore frunt, darvor to borgen gesath, nameliken Hans Pyning, Cord Pyningk, Cord Osselicke, Hinrick Schowerte. Dusse borgen hebben uns dem rade ghudgesech vor allen schaden, unde dat se ock nummermer schal komen uppe de Nigestad. Wered, dat dusse vorbenomden Dilige unde Bernd Pickerdes alsodan orveide nicht enhelden alse vorgescreven is, in wate schaden unse here de domprovest unde de rad der Nigenstad unde alle de ore edder der se mechtich worden, nu edder in tokomen tyden, wu de sake worde edder to queme myt worden edder myt werken, den schaden willen dusse vorbenomden borgen gelden, dat se so willekorden, do se de richter darumme fragede, dar se alle 'ja' to seden unde loveden dat myt hande unde myt munde. Hyr is byfaren myt vorspreken unde dingkluden, alse sick ordel unde recht uthwisede is, unde ick Bertelt Grimpe beken openbare under mynem ingesegel, dat ick hyr hebbe eyn vorsprake to gewesen, unde wy Hans Pole unde Hinrick Machteshusen bekennen openbare under unsen ingesegelen, dat wy hyr hebben dinngklude to gewesen, unde is gescheyn na der bord Christi unses heren Verteynhundert jar darna in deme eynundenegentigesten jare, ame sunnavende vor Jacobi apostoli.