Ek Clawes Bussen, nu tor tyd voget uppe der Nygenstad vor Hildensem mynes gnedigen hern, heren Johannes van Castella, artzebisschup to Trane, domprovest to Hildensem, bekenne openbare in dussem breve under mynem ingesegel, dat vor mek, dar ik sath in gerichte in eynem gehegeden richte to rechter dingktid dages, quam de Roleffessche unde openbarde, wo dat se de ersam rad der Nygenstad vor Hildensem gegrepen hadde umme sake unde schulde willen, de se to ore hadden, unde se darumme in orer stad hechte unde slote gesat hadden. Der sake unde schichte hefft se sek myt dem ersamen rade gutliken unde wol vordragen, so dat se ohnen dancket, wente se sec umme groter flitiger bede willen orer frunde se quid, ledich unde los gelaten hebben. Hirumme so lovet de erbenomde Rolefessche myt orem guden willen unbedwungen unde myt wolberadem mode eyne rechte orveyde to holdende, unde swor dat myt oren liffliken fingeren stavendes eydes to godde unde alle synen hilgen, dat se noch nemant van orer weghen unsen gnedigen heren den domprovest unde den ersamen radt der Nygenstad vor Hildensem unde alle de ore unde ore borgers unde alle de, de ohnen tostan to vordegedingende, umme sodan willen nicht bedegedingen, clagen, anlangen schullen noch enwillen nummermer to ewigen tyden myt gerichte noch ungerichte, noch hemelick noch openbare neynerleyewys, wu men dat benomen konde, bynnen edder buten landes, myt worden edder myt werken, de sake to vorende dorch sek sulvest edder eynen anderen, unde de sake ock nicht bestellen lathen, se alle edder besunderen darumme bedegedingen unde anlanget werden ane alle geverde unde se ok tegen unsen gnedigen heren den domprovest unde den ersamen rad unde alle de ore vorbenomd nicht tegen syn wille de wile dat se levet. Alle dusse vorgeschreven unde nabeschreven artikele unde stucke intsampt unde eyn jowelk besonderen lovet unde sweret de erbenomde Roleffessche myt oren liffliken fingeren to godde unde alle synen hilgen stede unde vast unde unvorbroken wol to holdende ane alle list, behelp unde geverde, unde se enwil sek van sodan eyden nummermer laten losen, ock neyne dispensatien effte absolutien kreigen edder kreygen laten, noch van pawessen edder keyseren edder neynen heren geystlik edder wartlik, neynerleyge lyst edder geverdes darto bruken edder bruken lathen. To merer bekantenisse unde wissenheit dusse orveyde to holdende in alle oren puncten unde artikelen, so hefft de erbenomde Roleffsche dusse fromen menne darvor to borgen gesath, de myt namen Roleff Roleffes oren man, Hans Clawes, Tilen Tacken, Henningk Kelp, Hans Hickewolt, Hinrick Hallemeyger, Hans Susmane, Corde Lauwenkoppe, Didericke Lauwenkoppe, Jurgen Lauwenkoppe, alle borgers uppe der Nygenstad vor Hildensem, unde wereth, dat de erbenomde Roleffessche sodane orveyde nicht enhelde alse vorgeschreven is, in wathe schaden des unse gnedige her de domprovest unde de radt der Nygenstad vorbenomd unde alle de ore unde ore borgers, der se mogen unde mechtich werden nu edder in tokomenden tyden, wu de sake worde edder to queme myt worden edder myt werken, den schaden willen dusse borgen alle gelden, dat se alle so willekorden, do se de richter darumme fragede, dar se alle 'ja' to seden, unde loveden dat myt hande unde myt munde. Hir is byvaren myt vorsproken unde dingkluden, alse sek ordel unde recht uthwisende is, unde ick Bertelt Studers bekenne openbare under mynem ingesegel, dat ick hir eyn vorsprake byn tho gewesen, unde wy Hans Teske unde Hinrick Hulpe bekennen openbare under unsen ingesegelen, dat wy hir dingklude syn gewesen, unde ys gescheyn na der bordt Christi unses heren Veffteynhundert jar darna in deme anderen jare, am myddeweken na Oculi etc.