Ek Rolef Vrese, voghet to Hildensem, bekenne unde betughe in dussem breve, de beseghelet is mid mineme ingheseghele, dat vor mek, dar ek sat an gherichtes stad, quam Hannes van Dalem in deme rade van Hildensem, dar deselve Hannes bekande vor dene tins unde gulde, de ome unde Sweneken siner husvruwen van deme rade van Hildensem verseten were unde noch van on mach verseten werden van des breves weghene, de Greten unde Sweneken Sassen sprikt van deme benomden rade uppe teyn lodighe mark gheldes, dat deselve Hannes vor sek unde vor deselven Sweneken hebbe wederstadinge van deme rade des ghenomen, dat ome noghe, unde heft ghewillekoret, dat de rad unde de borghere unde de stad van Hildensem des tintses van des vorsprokenen breves weghene, he si nu rede verseten unde noch moghe van dere weghene verseten worden, scullen van Hannese vorbenomd unde van Sweneken siner husvruwen sunder jenigherleye naklaghe eder navorderinge ghensliken ledich unde los wesen. Desse stucke sint vor gherichte aldus overgan unde en vrede darover wracht, also ordele unde recht utwisede. Hir hebbe ek Ludolf Vrese vorspreke to wesen unde we Heneke Rodemund, Meyneke van Hende, Hannes Rutenberch, Henrik Sasse unde Tileke Sledorn hebben hir dinghlude to wesen, dat betughe we in desseme breve under unsen ingheseghelen. Unde ek Hannes van Dalem vorbenomd bekenne in desseme breve under mineme ingheseghele, dat al desse vorsprokenen stucke aldus overgan sin unde endet, unde dath ek se vor mek unde vor Sweneken mine husvruwen aldus selves ghewillekoret hebbe vor de in gerichte unde willet se to allen stucken unvorbroken stede holden. Desse bref is ghegheven na goddes bord Dritteynhundert jar in deme negheneundevefteghesten jare, des lateren daghes Alle goddes hilghen.