Ek Rolef Vrese, voghed mines herren van Hildensem, bekenne openbare in desseme breve, de beseghelet is mid mineme inghesegele, dat vor mek, dar ek sat in gherichtes stad in heghedeme richte to rechter dingtyd, quemen Cord van Medele, Gherborch sin echte husvruwe, de ichteswann was Kerstenes wif Stücken, unde Eylerd ere sone, Kerstenes sone Stucken, unde bekanden, dat se alsodane wedderstadinge entfangen hebben der drier mark gheldes jaregher gulde, de se Gherborch unde Eylerd vorbenomd hadden bi deme rade van Hildensem to ereme live, dat on dar wol an ghenoghe, unde leten den rad van Hildensem unde ere nahekomelinge der drier mark gheldes ghenstliken ledich unde los unde leten dar af vor gherichte mid gudeme willen, mid verticht alles rechtes, des se Cord van Medele, Gherborch unde Eylerd vorbenomd unde erer jowelk daran hadde unde willekoreden, dat noch se noch nement van erer weghene navorderinge eder naclaghe darumme don enscullen noch enwillen. Unde dar hebbe ek Rolef Vrese deme rade van Hildensem enne vrede over ghewracht unde is vultoghen mid vorsproken unde mid dinghiden unde is beordelet vor gherichte alse recht is. Unde ek Hannes Ghuntzeke bekenne, dat ek vorspreke hirto ghewesen hebbe, unde we Ludeke Pepersak, Meyneke van Heende, Hennigh Busse, Hannes Lampe unde Henrek Sasse bekennet under usen ingheseghelen unde we Hinrek Reppener unde Cord van Osede bekennet under ingheseghelen, de hir vorbescreven sint, dat we to alle dessen vorscrevenen stucken dinglude wesen hebbet unde dar over unde an ghewesen hebbet, dat se also vor gherichte uptoghen unde ghesendet sint. Dit is ghescen na goddes bort Dritteynhundert jar in deme dreundesesteghesten jare, des neysten mandaghes na Twelften.