Ek Cord van Hottelem, to desser tit voghet to Hildensem mines heren bisschop Johannes, bekenne openbar in dessem breve under minem ingheseghele, dat vor mek, dar ek sad in gherichte stad in gheheghedeme gherichte to rechter dinghtit daghes, quam Johannes Permuterer unde anclaghede Hermene van Goetinghe umme elven punt unde ses schillig Peynscher penninghe, de he ome sculdich were. Also quam desulve Hermen to gherichte unde bekande ome der schult. Do let Johannes vraghen enes ordels na dem male, dat he ome des gheldes bekende, wanne he it ome gheven scholde. Dar wart to rechte vunden, na dem male, dat he is ome bekende, so scolde he it ome gheven van stunt an dessulven daghes. Also quam Johannes vorbenomd darna enes anderen richtedaghes unde openbarde, wu dat Hermen vorbenomd ome siner bekanden schult nicht betalet enhedde, also ome to rechte ghevunden were, unde let do vraghen enes ordels, wu it dar nu umme scholde. Dar wart vor recht ghevunden, dat gherichte scole ome pandes helpen. Also antwordede ome de vronebode alse vor eyn pant vor sin erbenomde ghelt de beteringhe sines huses unde woninghe, dat bi sunte Andreas kerkhove neist Hanses Neren woninghe beleghen is, unde darto, wat in deme sulven huse van inghedoyme was. Do darna dre richtedaghe quam Johannes Permuterer vorbenomd unde bod de pande up unde voir darbi, alse wonheit is unde recht der stad Hildensem, unde dede dat deme sakewolden witlik mit dem vronenboden, unde let do vraghen enes ordels, wer he nu an den panden sin ghelt icht soiken mochte. Dar wart to rechte vunden, he moechte sin ghelt darane soyken sunder dat vorscrevene hus, na dem male, dat it eyn standeerve were, so scolde he dat holden jar unde dach den erven na unde den schuldemeren unvorbesteret. Do let he noch enes ordels vraghen, na dem male, dat he it holden scholde jar unde dach, wer he is icht vormeden unde bruken mochte to hulpe deme tinse, de darvan ghinghe. Dar wart vor recht ghevunden, na dem male, dat he it mit ordelen vorwarde, to mochte he dat vormeden unde bruken to hulpe deme tinse. Hir is bi ghevaren mit vorspeken unde mit dinghluden in aller wise, alse ordel unde recht utwisende is, unde ek Hans van Lesse bekenne under minem ingheseghel, dat ek hir hebbe vorspreke to ghewesen, unde we Cord van Honse de lakenscherer, Bartolt van dem Solte bekennet under usen ingheseghelen, dat we hir hebbet dinghlude to ghewesen, unde is gheschen na goddes bord Verteynhundert jar darna in deme sesten jare, des midwekens neist na deme sondaghe Quasimodogeniti.