Ek Cord van Hottelem, to desser tit voghet to Hildensem mines heren bisschob Johanes, bekenne openbare in dessem breve under minem inghesegele, dat vor mek, dar ek sad in gherichtestad in gheheghedeme gherichte to rechter dinghtit daghes, quam Cord van Honse de garbrader unde bekande, dat he deme rade unde der stad to Hildensem hebbe ghesad unde vorpendit sine boude unde woninghe mit aller tobehoringhe alse dar to hord, dar he nu inne wonet unde mank den garbraderen an dem orde bi der wesle beleghen is, in wedderstadinghe der sevenundetwintich Rinsche gulden unde dreundedrittich slichter crusecrossen des nalatenen ghudes Egherdes Klockemans saligher dechtnisse, de nu inghevordert unde entfanghen heft to Stetin Hinrik Klockeman, des benomden Egherdes broder, dar de rad van Hildensem ore tovorsicht in tokomenden tiden deme rade to Stetin vorghescreven hebbet vor ansprake; weret, dat deme rade unde der stad to Hildensem in tokomenden tiden umme dit vorscrevene ghelt jenich ansprake schude, dat denne de rad unde stad to Hildensem sek der ansprake mit der vorscrevenen bouden unde woninghe moghen entheven. Hir is bi ghevaren mit vorspreken unde mit dinghluden in aller wise, alse ordel unde recht utwisende is, unde ek Hans Botel bekenne under minem inghesegele, dat ek hir hebbe vorspreke to ghewesen, unde we Bertolt van dem Solte, Tileke Thanne unde Alf Adam bekennet under usen inghesegelen, dat we hir hebbet dinglude to ghewesen, unde is gheschen na goddes bort Verteynhundert jar darna in deme sesten jare, des dinghsdaghes neist vor des Hilghen Lichamen daghe.