Nach Cristi unßes hernn gebort Dusent viffhundert in sevenunndvefftigestenn jar, dinxstag den sesteinden des mantes februarii ist inn myner openbarn notarii, ock der tugen nedden beschreven dar tho sunderlich geeschet unnd gebeden jegenwardicheit personlich erschinen de ersame Eggert Ploer, camerarius des capittels tho Hildensem, wu wol swach ame live, idoch syner vornufft und synlicheit mechtich, betrach[ten]nde, dat nicht wissers denn minschen dan de doeth und nicht unwissers der stunde des dodes, up dat he nun uth anligge[nder] kranckheit van diessem jamerdale ane testament und vorordinge synes lesten willenn nicht scheidenn, ock syner guder halven twischen synen angebornen nicht entstaen moge, so hefft he godt dem almechtigen tho love und ehren und syner sele to troste van den gudern, so ohme godt vorlent, synn testament und wi lesten willen so geordent und gemaket in nabeschreven forme und wyse: Erstlich hefft he syne sele godt dem almechtigen in dat lydent unsern hernn Jesu Christi bevolen unnd begert van godt de szele van synem corper gescheiden, dat men ohne denne mit temelikenn exequien by de kercken tho Hildensem begravenn werde. Dar nha wil he, dat syne testamentarien durch godt syn testament annhemen und lesten willenn fullenbringen unnd eynem idernn de legata und gave, wu hir nach vortekent, nach innaminge syner utgande schulde geven unnd overandtwordenn. ||
Unnd he gifft erstlich denn gemenen goddes armen sestich gulden münthe den armen tho kost und kledern etc., na tyden uthtodelende unnd sünderlich al denn huszarmen. ||
Item synem bruder Herman gifft he drittich drittich gulden münthe. ||
Item synem broder Hanße gift he drittich gulden an eynem huße up der Niggenstadt und X gulden uth synen uthganden schulden, synen oldenn brunen rock und vif hemmede. ||
Item synem broder Jurgen gifft he XL gulden uth synem schulden, dar tho synen grawen rock und viff hemmede. ||
Item synen beyden sustern Chaterinen und Anneken gifft he eyner jedernn drittich gulden münthe, alle uth synen schulden. ||
Item syner suster Greteken, de wile de eyn swagk gebrecklich persone, gifft he dersulvenn sestich gulden Münthe und dat bedde, szo ohme Dirick Kleige vor twolf gulden gedaen und dar tho alle synn lennewanth. ||
Item Annen, hernn Johan Stein kockinnen, gifft he veer gulden münthe, und der maget Barbarann ock veer gulden münthe item. ||
Item synem sone Hinrick Ploer gifft he syn hus up dem berge myt syner thobehoringe, achtet he up LXXX gulden münthe, dar tho gifft he ohme uth den uthganden schulden twintich guldenn münthe. ||
Unnd wanner duth vorgescreven also vorgeven were, denne noch wes overich van synem gude, dat sulve schullen syne testamentarien in de hende der armen delen. ||
Were ock jemandt van synen brodernn unnd sustern, de mit syner gave nicht gesaliget und syn testament nicht holden wolde, de schal syner gave entberen, darmith schullen sich de testamentarien tho rechte weren und dat ander umme goddes willen geven. ||
Unnd up dat sulch sein testament und leste wille tho borliger fullenforinge komen moge, heft he in der besten forme, so he von rechte ader gewonthe am bestendigesten konde und mochte, tho synenn testamentarien und synes lesten willen executorenn gesat und gemaket, nomlich den ersamen Andreas Vinckensteinn camerarius abwesende als jegenwordich, und synen broder Jürgenn jegenwordich, und orer jedenn in sonderheit, unnd hefft den sulffigen fulle macht gegeven, na synem dode sick alle syner guder tho undermathen, syne utgande schulde inthonemende, ock wes he schuldich, alse sunderlich XXXII gulden münthe den camerariis im dome tho Hildenßem darvonn tho betalende. Dar tho hefft he ohne macht gegeven, alle datjennige tho doende, dat rechte warhe testamentarien konnenn und mogen von rechte und gewonthe cum clausulis ad lites unnd allen andernn nottrüfftigenn articulen und wil, dat duth vorgeschreven syn testament und leste wille syn schal mit bedingunge, dat sulve tho vorandern, tho vorringerende ader tho vormerende, und hefft my openbaren notarius ersocht und gebeden, ohme hir aver eyn ader mehr instrumenta, so vele ohme und synen testamentarien noth und behof. Geschein synn dusse alle bynnen Hildenßem in des werdigen, hoichgelarten und achtbarn hern Johan Steins, der rechte licentiaten, sanckmester etc. im dom tho Hildenßem, up dem sael bovenn dem dorwege darsulvest, jegenwordich byweszende dem erhafftigen und ersamen hern Philippo Lurman, vicario in dhom tho Hildenßem, und Hans Bockbender, borger tho Hildenßem, tugen hir tho sunderlich geeschet unnd gebeden, David Fabri notarius ad premissa requisitus ssst. ||
||
Antekunge utgander schulde Eggers Ploer, de ick David Fabri notarius vorbescreven uth synem munde geschreven. ||
||
Item myt synem hern Johan Stein hefft he syck in mynem biweßende bereckent, dat he XVI jar syner werde gedenet, ider jar achte gulden münthe tho lone, angesehen, dat syn her ohme vaken in syner nerung vele fordels gedaen und gondt, dar up he entfangen XL gulden, tho Dinckler XX gulden, thom husze XXIIII./2 guldenn, tho Arberge VII gulden, von Jacob Herwech von roggen IIII gulden, so steit ohme nha XIII gulden I k[rossen] by dem hernn Johan Stein. ||
XXIIII gulden Jaen Lopke vor XXX scepel roggen, deditur summa cuncta Passce. ||
XLVIII gulden de Krusesche imm Rosenhagen vor I foder garsten und I./2 foder roggen. ||
XLIII gulden Dirick Prieß, des is XXX gulden hovetsummen und das ander is tins, und eyn deil van eynem swine, Margreta angenommen. ||
XXIIII gulden Harmen Krep tho Gifften. ||
X gulden Jürgen Dorstfelt, dedit. ||
X gulden Hans Cock. ||
X gulden Herman Stolte to Reppener utgelecht gelt. ||
X gulden Arnnd Carsten, de vogt up dem berge. ||
VII gulden Herman Rüdeman up der Niggenstadt. ||
[latus:] 210 floreni 10 schilling. ||
V./2 gulden Herman Scaper tho Lutken Escherde. ||
VIIII daler Achilles borger tho Hildenßem, dedit. ||
IX gulden VI grossen Hinrick Bruns fruwe vor IIII molder roggen. ||
II gulden Mauritz Cock up der Niggenstadt, hef Jurgen entfangen. ||
V gulden Hinrick Wever, dar von komen synem hern V punt Huddessem. ||
VI gulden steit ohme ein Kettel, Margreta habet. ||
V gulden hefft he gegeven vor tennen becken, sin gedelet. ||
XII gulden steit ohme eyn bedde myt tyner Kolnschen linen van Dirick Kleigen, hefft Mergrete. ||
II gulden an eynem kettel bey dem vogede tho Borßem. ||
V gulden an eyner sulvern keden, hefft de kokinne. ||
Ic XXX gulden an dem huße by syns heren hove. ||
[latus:] II./2 c 27 floreni 2 scilling.