Wir Johan Thumbdechandt, Gebharth Scholaster, Senior unnd gantz Capittell der Kirchenn zu Hildensheim bekennen offendtlich in unnd mit diesem Brieffe für uns, unsere Nachkhomen unnd sunst gegenn allermenniglich, das wir Ilseben, Balzer Heinenn Dochter, in unserm Ambt Borsum geborenn, haben frey gelassenn unnd laissenn sie frey, ledig unnd loß aller Behorung unnd Eigenthumbs, darmit sie unßer Kirchenn bißahnhero verwandt unnd behorig geweßenn, in Krafft dieses Brieffes, als das wir unnd unsere Nachkhomenn an ihr hinfürder nit sollenn oder wollenn einiges Eigenthumbs mher zu beredenn habenn. Darentgegenn hatt sie uns eine gentzliche, ewige Vorzig gethann alles Erbes unnd Gutes, darvon sie uns eigenn unnd behorich gewesenn, auch aller behorigenn Guther, so ihr in einigerley Weise künftigliech anvalenn mochtenn, nimmehrmer darauff zu sochenn, und sich ferner verplichteth, uns und unsere Kirchenn unnd Stiefft nimmehrmer zu bescheidigenn oder durch andere bescheidigenn zu laessenn, sonderen vhielmher getrew unnd holdt zu seinn, unser Bestes zu thuen und Arges zu warnen unnd nach Vermügenn abzuwendenn, wie sie solchs für sich unnd ihre Erbenn alles vhest und unvorbrochenn woll zu haltenn für Notarien unnd Zeugenn ihren leiblichen Eide gelobt und geschworenn. Sie hatt uns aber nichtdestoweiniger Cathrinen Bussenn widderumb an den Eigenthumb gesetzt, die sich alsovort uns unnd unse Kirchenn widderumb eigenn ehrgebenn unnd verwandt gemacht unnd sulches mit ihrem leiblichenn Eide bekrefftigt, darbey ob unnd ahnn sein geweßen Pether Hünneman unnd Hermen Kock, Kemerer unnd Kartatenkoch der Kirchen zu Hildenßheim, als Gezeugen hirzu sonderliech erfordert unnd gebethenn. Des alles in Urkhundt haben wir unser Kirchen grosse Insiegell wissendtliech an diesenn Brieff gehangenn geben, nach Christi unsers liebenn Hern unnd Salichmachers Geburht im Tausendt fünfhundert und darnach im sechsunndachtzigsten Jhare, den 15. Tagk Marcii.