Wy Johann van gots gnaden bisschup to Hildensem, hertoge tho Sassen, Engern unde Westphalen, bekennen openbar vor uns, unse nakomen unde alsweme, so alse wy unsem leven getruwen Hennige Brands an dem gude, so Cordt van Gottingen, zaliger borgermeister unser stadt Hildensem, van uns unde unsem stichte to lehne gedragen, nomptlichen viff morgen lands up dem velde to Drispenstede belegen unde ses Hildensemsche schillinge an dem fronentinse bynnen Hildensem eyn gnedich gedynck gegeven hebben unde uns nu sulk gudt dorch den dotliken affgangk zaligen Cords van Gottingen alse den lesten vam slechte deger unde alle vorleddiget, deme also na hebbenn wy Hennige Brandes to eynem rechten ervemanlehne mit sulken viff morgen lands unde ses Hildensemschen schillingen an dem vronentinse alles vorbenomt belehnt unde belehnen one darmede alse manslehnsrecht unde wonheit is jegenwordigen in crafft desses breves mit aller tobehoringhe unde rechticheit, nichts utbescheiden, in aller mate, so zalige Cordt van Gottingen dat tovorn gehat hefft, unde willen sulks guds gedachtem Hennige Brands syn rechte bekennige her unde ware wesen, wan unde wo vaken ome des noth unde van uns geesschet werth, unde des to urkunde hebben wy unse ingesegel unden an dessen breff witliken heten hengen na Christi gebort Veffteynhundert unde sesteyn jar, am dage Symonis unde Jude apostolorum.