Wy Johann van gots gnaden bisschup tho Hildensem, hertoge tho Sassen, Engern unnd Westvalen, bekennen openbar vor uns, unse nakomen unnd vor alsweme, dat wy belehnt hebben unnd belehnen jegenwordigen in unnd mit crafft desss breves tho eynem rechten ervemanlehne alse lehnsrecht is Henninge Brands alse den eldesten, unsen leven getruwen, mit verdehalffe hove lands vor1 unser stadt Hildensem up dem Oldendorper velde belegen, mit dem halven tegeden tho Emmercke, mit der Klickmolen twisschen Hasede unnd Forste, mit eyner hove lands unde eynem hoffe im dorpe unnd uppm velde tho Bavenstede, mit achteyn Hildensemeschen penningen an dem fronentynse, mith eyner hove lands unde eynem hoffe im dorpe unnd velde tho Schelreten, unnd mit dem Piperkampe vor Peyne mith alle desser vorgeschreven guder tobehoringen unde rechticheiden in water, in weiden, in holte, in velde, in wisschen unde anders, wu me dat benhomen unnd sick der gebruken mach, nichts utbescheiden, in aller mate Hans Brands de tovorn van unsem stichte unde uns to lehne dragen hefft, unde wy willen gedachten Henning Brands desss guds unde lehns syn rechte bekennige here unnd ware wesen, wur unde wan ome des noth unnd behueff is und van uns geesschet werth. Dess to grotter urkunde hebben wy unse ingesegel an dessen breff witliken heten hangen, nach Christi unses hern geborth Veffteynhundert unde dritteyn jar, am donredage in den Hilligen Passchen. ||
||
1 folgt gestrichen: dem.