Wir von Gots Gnaden Heinrich der Junger, Hertzog zu Braunschweig unnd Lunenburg etc., bekennen vor uns, unser Erben unnd allermeniglich, das wir den erbarn unnsern lieben getrewen Hening Rauscheplath zu einem rechten erblichen Manlehen mit dem halben Dorff Meineringhusen mit dem Kirchlehen, dem Evershagen, mit dem Zehenden uber beide genante Dorffer unnd mit zweien Vischerien in der Leyne, mit dem Rotzehenden am Rotberge uber Allvelde, mit funfzigk Morgen Lands zu Haskenhusen unnd ein Hofe belegen im Dorf, mit dem Zehenden uber dasselbig Dorf, ausbescheiden was man zur Burg Wintzenburg bawet mit dem Gute zu Amensen belegen, das ettwan Burckhart von Dalem gewest ist, mit dem Zehenden in der Veldmarckh zur Hoenboecken, mit der Bischofswischen vor Alvelde, mit vier Huef Lands und zweien Kothofen zu Adenstede in der Wintzenburgischen Borde und einem Hofe zu Westfelde mit allen iren Zubehorungen unnd Gerechtigkeiten, mit anderthalber Huefe Lands unnd einem Hofe unnd einer Worth zu Hilbrechtshusen, noch mit einer Huef Lands unnd dren Worden darselbst, unnd mit einem Meigerhofe unnd zwen Huef Lands unnd einem Hofe zu Himpstet, mit aller diser vorgeschrieben Guter Zubehorungen unnd Gerechtigkeit in Holtz, Veld, Wasser, Wischen und Weiden, wie man die benomen unnd sich der gebrauchen mag, nichts davon ausbescheiden in aller massen, als gedachter Henning Rauscheplath soliche Guter zuvorn von Bischove Johan von Hildensheim, dem die als dem Verechtiger des Heilligen Romischen Reichs umb seines streflichen Ungehorsams willen genohmen und an uns gekommen, zu Lehene gehebt, zu seinem Rechten belehendt haben unnd belehen gegenwertig also, das nun hinfuro der genant Hening Rauscheplath solicher Guter geniessen unnd gebrauchen, die auch von uns zu erblichen Manlehen allweg, wan ein Fal kombt, tragen unnd entpfahen sol, uns davon getrew unnd gewertig sein, unser Pests thun, wissen unnd werben, unsern Schaden warnen und weren nach seinem Vermoge, auch in keinem Rat oder That sein, die wider uns und unser Erben sein mogen, sonnder sich wie ein getrewer Lehensman seinem Lehenherrn zu Recht schuldig ist halten, welches alles gedachter Henning Rauscheplath unns Eide und Gelubt gethan, derhalb wollen wir ime der vorgeschrieben Gutter Werschafft thun, inen darbey hanthaben und nach aller Notturfft vertedingen, sovil wir zu Recht schuldig, alles ane Geverd. Haben des zu Urkundt unnser furstlich Innsigel an disen Brief lassen hengen unnd geben nach der Geburt Christi unnsers Herren Tausent funffhundert und im einunddreisigsten, Dinstag nach Corporis Christi. ||
||
[Kanzleivermerk:] J. Hannsted ssst.