Von Gottes Genaden wir Ernst Bischove der Stifft Hildesheim unnd Freising, Erwellter zu Bischoven des Stiffts Lüttich, postulirter Administrator unnd Herr zu Stabol unnd Malmandie, Pfalzgrave bei Rhein, Herzog in Obern- unnd Nidernbayrn, Herzog zu Bullion, Margrave zu Francimondt, Grave zu Lohen unnd Longien, bekhennen für unns unnd unnsere Nachkhomen im Stifft Hildeßheim hiemit unnd in Crafft diß Brieffs, demnach wir von dem vessten unnserm lieben Getreuen Johann von Bodtmar unndertheniglich angelanngt unnd gebeten worden, da berürter unnser Stifft Hildeßheim mit göttlicher Vorleihung in bössern Stanndt khombt unnd geraichet, unnd alsdann unns ain rittermessig Lehen, so ime oder den seinen gelegen, vorlediget würde, das wir genediglich geruehen wollten, ine unnd seine Leibs-Lehenserben mit demselben anzusehen, zu belehnen unnd ain genedige Provisionem darauf zu geben, das wir seine unnderthenige Bith, auch die getreuen Diennste, so gedachter Johann von Bodtmar, auch sein Namenn und Stamen unns und unnserm Stifft Hildeßheim vil unnd lannge Jar gelaistet unnd fürterhin wol thun unnd laisten khonnen, solches auch unnderthenig ze thun sich erbieten, angesehen unnd ine unnd seine Leibs-Lehenserben mit dem negsten rittermessigen Lehen, so zu unnsers Stiffts Hildeßheim bösserm Zuestanndt unns heimbfallen unnd inen gelegen sein wirdet, zu belehnen genediglich bewilliget unnd zuegesagt, belehnen sie auch hiemit gegenwürtig unnd in Crafft diß Brieffs also und dergstallt, do sich uf obspecificirten Fall begebe, das unns unnd unnserm Stifft Hildeßheim ain rittermässig Lehen gehörtermassen haimbfiele, das negste, das alsdann berürter Johann von Bodtmar unnd seine Leibs-Lehenserben solch Lehen mit allen seinen Ein- unnd Zuegehörungen von unns zu Lehen haben, einnemen, nützen, niessen unnd gebrauchen sollen unnd mögen, dieselbige vordiennen auch dem Lehen, so offt das zu Fall khombt, rechte Volge thun als Ritterlehenrecht unnd -gewonhait ist, jedoch unns, unnsern Nachkhomen unnd Stifft an der Lehenschafft unnd Lehensgerechtigkhait jederzeit unvorgriffen unnd one Schaden. Des zu Urkhundt haben wir unns mit aigner Hanndt unnderschriben unnd unnser Secret-Innsigel wissentlich an disen Brief hanngen lassen, geben uff unnserm bischoflichen hildeßhaimischen Residentzhaus Steurwald, den neunten Monatstag Martii nach Christi unnsers lieben Herrn unnd Sälligmachers Geburt im Fünfzehenhundert einunndachtzigisten Jaren. ||
||
[Autograph:] Ernst Hertzog in Bayrn ssst.