We Henric van der gnade goddes bischoph des stichtes to Hildensem bekennet openbare in desseme breve, de vertich morghene landes, de beleghen sin uppe deme velde to Honhamelen unde twe hove uppe deme velde to Olum mit alleme rechte unde mit alle deme, dat dar to hort, de Hannes Ecghelinghes, borghere to Brunswic, unde Ghese sin husvrowe mit willen unde mit vulborde alle orer erven vorkoft hebbet Volcmare van Alvelde, unseme borghere, unde Mygen siner suster unde oren erven unde in ore were gheantwordet unde ghelaten hebbet vor gherichte, dat dat mit useme willen unde vulborde gheschen is, unde hebbet des to ener openbaren bewisinghe use ingheseghel an dessen bref ghehengt, unde is gheschen na goddes bort Dritteynhundert iar in deme eynundesesteghesten iare, des dynsdaghes na der hilghen Drevaldicheyd daghe.