We Henrik van der gnade goddes bisch[op] to Hildensem bekennen unde don witlik alle den, de dessen bref sen eder horen lesen, dat we mit witscaph unde mit vulborde uses capitteles Bertolde van Goddenstidde, Jutten siner echten husvrowen unde oren erven hebben ghelaten unde laten in dessem breve to deme borchlene to Woldenberghe vif hove uppe deme velde to Syliem mit alleme rechte unde [m]it aller sclachten nut unde mit alle deme, dat dar to hord, also alse dat borchlen sin vader ghehad hadde, aldusdanewis: weret, dat we eder use nakomelinghe eder dat capittel wanne neyn bischoph en were dat vorbenomde gud van Bertolde van Goddenstide unde Jutten siner echten husvrowen eder van oren erven welden wederhebben, dat scholde we on eder se os vorekundighen twischen sunte Mertens daghe unde Wynachten, unde denne to Paschen dat darna neyst to comende is, so sculle we unde willet on bereden teyn mark lodighes sulveres Hildensemscher wichte unde witte, de se os an redeme ghelde darup ghedan hebbet. Unde des to eyneme orkunde so hebbe we use ingheseghel ghehenght an dessen bref, unde we Vulrad deken, Otto scolmester unde dat ganze capittel des stichtes to Hildensem bekennet, dat alle desse vorscrevenen dingh gheschen unde ghedeghedinghet sin mit useme willen unde vulborde. To eyneme orkunde des so hebbe we uses capitteles ingheseghel ghehenght an dessen bref, unde is ghesche [!] na goddes bord Dritteynhundert jar in deme sevenundevofteghesten jare, in user vrowen daghe Lechtmissen.