Ek Cord Stym bekenne openbarliken vor mek unde vor mine erven in dessem breve under minem inghesegele, dat ek Luder Broygere unde sinen erven hebbe verkofft to enem rechten ervenkope den halven tegheden uppe dem Oldendorper velde vor Hildensem unde driddehalve hove landes belegen an dem Ghalchberghe vor Hildensem unde veftehalven schilling gheldes an dem vrontynse to Hildensem, unde van minem heren van Hildensem to lene gheyt myt aller tobehoringhe also dar to hord unde mit alleme rechte, unde ek hebbe dat gud minem lenheren mineme heren van Hildensem to Ludeken Broygers had [!] by twen mines heren mannen, alse by Sandere Schonehalse unde Hanse van Gotinghe, upghesand unde ek do des benomden gudes vor mek unde vor mine erven ene rechte vertichte, unde we Sander Schonhals unde Hans van Gotinghe bekennet openbarliken, dat we unsem heren van Hildensem dit benomde gud van Cordes wegen Stymes to Ludeken Broygers hand hebbe upghebracht. Desses to bewysinghe unde umme Cordes bede willen so so [!] hebbe we unse ingheseghele by Cordes ingheseghel vorbenomd an dessen bref henght, na goddes bord Driteynhundert iar in deme seveneundeneghentighesten iare, in sunte Antonius daghe.