Wy Magnus von godes gnaden bischop to Hildensem bekennen openbar in dussem breve vor uns unde unse nakomelinghen, dat we Hermen unde Ludelffe Ruscheplaten broderen hebben eyn ghedinghe leynt an alle Gerdes von Gandersem gudern, de he von uns unde unsem stichte to leyne heft, alse by namen den tegeden over dat dorp Wolperode unde over de veltmarke buten unde enbynnen dem dorpe, wu dat men dat benomen mach, myd alleme rechte in holte, in velde, in watere, in weide unde myd verdehalve hove landes, myd dem tegedthove unde eynem meygerhoff gelegen by der linden, myd veer hove landes unde myd eynem kothofe vrig von deynste unde aller plicht, unde den rottegeden to Hildebrechteshusen myd alleme rechte unde sesteyn achtword in dem Wrochteshuser velde an dem Barenberghe. Dusses vorgescrevenen gedinges unde leyns wille we vorgescrevene her Magnus edder unse nakomelinge den vorgescrevenen Ruscheplaten or bekennige here unde were wesen, wor unde wanne, wu dicke on des [v]on uns noyd is. Des to bekantnisse hebbe we unse ingesegel an dussen breiff heten gehangen, n[a] godes gebord unses hern Dusent verhundert darna in dem sevenundetwintigesten jare, an sinte Walburgis dage.