Wy Magnus van goddes gnades[!] bisscop to Hildensem bekennen openbar in dussem breve vor uns unde unse nakomen, dat wy belend hebben unde belenen myt hande unde munde to eynem rechten ervenmanlene Hermen Russceplaten den jungeren myt dussen nabescrevenen goderen, alse myt eynem frygen borchlene to Winsenborch by dem Beygersberge unde darto bruken holt, water unde weyde, unde m[y]t eynem garden by dem Stokhagen benedden der borch unde mit dren hove landes unde twen hoven to Eygerhusen unde myt den goderen to Ammesen unde Vordessen unde to Westvelde, so dat syn vader vor van usen vorfaren unde uns to lene ghehad heft unde syn broder unde he sek gotliken ghescherd unde in den goderen vordragen, so dat de genante Hermen dusse vorgenanten godere vor syn bysunderen g[h]od to lene entfangen heft. Ok is de genante Hermen ghekomen mit vulheftiger bewisinge unde heft van uns entfangen dat dorp Hildebrechteshusen mit dem denste unde mit scaperige, mit vogedye unde aller plicht unde sesteyn hove landes unde twey zedelhove unde achte kothove unde den tegeden unde mi[d] dem walle, alse de darsulves myt dem graven begreppen is, unde darto bruken der holtmarke in dem Danwedel to synem behof myt aller [to]behoringe, so he dusse vorgescrevenen godere alle vor syn bysun[der]en van uns to lene heft, wi wy syn rechte bekennige here unde were syn, wor unde wanne ome des nod is unde dat van uns esschende wert. Dusses to orkunde hebbe wy unse ingezegel laten hengen an dussen breff in dem Verteynhundersten 1unde1 sevenundetwintigesten jare der bord Christi unses heren, an sunte Andreas dage des apostoles. ||
||
1..1 ‚unde‘ korrigiert aus ‚jare‘.