Wii Cord van Bavenstede unde Cord Terwen, borger to [Hild]enßeme, bekennen opembar in dusseme breve vor alsweme, alse wii rechte vulstadige vormunden sint Hinrick Ghosberges zeliger Lodewiges sonen, so hebben wii van siner wegen upgenomen unde tor noge entfangen van deme geduchtigen knapen Herberthe van Rutenberge achtentich gude Rinsche gulden, de wii in sine unde siner erven nuth unde vromen gewant unde gekart hebben. Vor de sulven achtentich gulden hebben wii Herberthe van Rutenberge unde sinen erven geantwerdet unde overgegeven, antwerden unde geven ome over in macht dusses breves sodanen breff, alse zeliger Lodewige Ghosberge unde sinen medebescrevenen van Hinricke unde Ludeken gebroderen den Hovelingen uppe twe hove landes vor Hesede gelegen gegeven und vorsegelt is, also dat Herberth van Rutenberge unde sine erven des sulven hovetbreves rechte holder unde manere sint unde schullen unde mogen der vorgescrevenen twe hove landes van des breves wegen brukende sin in aller formen, alse de breff dat inholt, sunder Hinrick Ghosberges unde siner erven edder iemandes van siner wegen gheystlike edder wertlike insage, dat wii Cord van Bavenstedde unde Cord Terwen vor Hinricke Ghosberge unde sine erven alse rechte vulstadige vormunden reden unde loven in guden truwen sunder geferde to holdende, unde hebben des to bekantnisse use ingesegel gehangen an dussen breff, na der gebort Cristi unses heren Verteynhundert iar darna in deme achteundevefftigesten iare, amme sondage Quasimodogeniti.