We Ernst van godes gnaden bysschop to Hildensem bekennet openbare in dusseme breve vor uns unde unse nakomelinghe, dat wy gelegen hebben unde lehnen in dusseme breve Ludeleve van Salder, Hanses sone, unde synen erven to rechtem erfmanliken lehne mit sodanen guden gudern, alse Hans van Salder syn vader unde her Asschwin van Salder syn grotevader zeliger dechtnisse van dusem stichte to Hildensem to lehne hadde, nomeliken den tegeden unde viff huve landes to Lutken Himstede, den tegeden unde viff huve landes to Bisschopsluttere vor deme Barenberghe, dry huve landes unde den tegeden over dry huve to Huddessem, eyne huve landes to Warsen, twe huve landes unde twe hove, veir wisschebleck to Haddendorpe, eynen meygerhoff unde veir huve landes to Emmerke, dry huve landes to Gifften mit orer tobehoringhe, den halven tegeden to Broystede, den halven tegeden to Freden mit den gudern, de de van Salder hebben to Borchstempne unde Nortstempne mit orer tobehoringhe unde mit sodan gudern, alse hebben to Woltwissche mit orer tobehoringhe. Icht dusse ergenante Ludolff van Salder mer gudere vunden in synen breven edder registeren, de hirinne nicht benomet weren, hebben wy deme vorgeschreven Ludeloff van Salder un synen erven so vullenkomeliken gelegen, icht se hirinne beschreven stunden, unde wy willet dusses lehnes Ludeleve van Salder unde synen erven rechte here unde ware wesen, wur unde wanne unde wu dicke one des not is unde se dat van uns esschen. Dusses to orkunde unde to betuchnisse hebben wy one dussen breiff ghegeven beseggelt unde bevestent mit unsem ingesegel, unde is gescheen na Christi bort Veirteynhundert jar darna in deme tweundesestigesten jare, am mandaghe na sunte Iacobs daghe des hilghen apostelen.