Wy Valentin vann gotz gnaden bischup tho Hildensem bekenne openbar in dussem breve vor uns, unse nakhomen und alschweme, dat wy dem erwirdigen und wyrdigem unsem leven andechtigenn hern Harman abbet und gantzem convente des closters tho sunte Michael bynnen Hyldensem eder holder dusses breves mit orem guden willen rechter warhafftiger schult pflichtig syn verdeholffhundert gude fulwichtige Rinsche goltgulden hovetsummen, de wy thor noge upgebort und in unses stiffts nut, fromen und beste angelecht hebbenn, sunderlich in itzigen osterligen umbschlegen. Derhalben so verpflichtigen wy uns vor uns und unse nachkomen mit bewillinge unses erwerdigen dhomcapittels tho Hildensem, dat wy schullen und wyllen dusse vorbenompte hovetsomme up negestkomende Egidii und darby und beneffen up ithlich hundert drey goltguldenn tynses an gudem fulwichtigem golde dem gedachten abbede und synen medebeschreven weder affgeven, vornogen, entrichten und bethalen sonder insage eder behelp, ock unbehindert und unbekummert vor alsweme sonder jennigen lengern vertoch, alles getreuwelich ane geferde. Und dusses tho grother vorwyssinge so hebben wy ome und synen mitbenompten hir vor tho borgen gesettet de erwerdigen, wyrdigen und erbarn hern Ulricke abbede tho sunte Goderde, hern Luleffen van Velthem, dhomdecken der kercken tho Hildensem, hern Coerde Kock, decken tho dem Hailigen Creutze, hern Borcharde von Obarge, decken tho sunten Andrees, hern Andrees von Lochawe und hern Brune van Teteleben, dhomhern, unse prelaten, rede und leven andechtigen. Und wy itztbenompten borgen bekennen oppenbare in dussem sulven breve, dat wy volstendige borgen sampt unde besundern vor unsen g[nedigen] h[eren] von Hildensem geworden syn und vor syne f[orstlige] g[naden] gelovet hebben, also dat dusse vorbenompte verdeholffhundert gude volwichtige Rynsche goltgulden hovetsummen tegen dat fest santi Egidii na dato allererstvolgende ane allen lengern vertoch, ock sunder jennige insege ader behelp, dar by und beneffen elfftehalff Rinsche gulden der sulven weringe als den halven tyns bemelten tidt over darup lopende unbehindert und unbekummert vor alsweme volstendich schullen den wolgedachten hern abbede tho sunte Michael und synen medebeschreven in eynem hope wol bethalet werden, dar vore wy mede helpen, raden und gudt sein wyllen alse rechte borgen samptlich und sunderlich ein itzlich vor full und ein vor alle, und wu daran jennich mangell eder gebreck gescheige - alse doch wil got nicht don schall - desfalles schullen und willen wy sampt und besondern als volstendige borgen up erst esschent und manent uns thom inlager und closterleger instellen mit egener personen, ock unser eyn na dem andern nicht tho wachten, sick darmede ock nicht behelpen, sondern ein itlicher van uns holden, leisten ein recht closter- und inlager dages unnd nachts, dar nicht uth, so lange, dat vielbenompten hern abbede unde synen medebeschreven dusse vorbenompten verdeholffhundert gude fulwichtige Rinsche goltgulden hovetsummen mit vorangetzeigten halvem tynsse sampt erleden schaden, ifft jennich darup gelopen were, thor noge entricht unde bethaldt syn, alles getreuwelich ane jennich geferde. Alle vorgeschreven stuck, puncte unde artickell dusses breves reden und loven wy Valentin bischop tho Hildensem sackewolder und wy andern als volstendige borgen samptlich edder besundern by unsern ehren, wyrden und stende stede, vast und unverbrocken woll tho holden. Des tho urkunde hebben wy itztbenompte Valentin bischup als sackewolder und wy andern als volstendige borgen itzlicher unser insiegel an dussen brieff wittlick thon hangen, und wy Otto scolaster, senior unde gantze capittel der kercken tho Hildensheim bekennen und betugen in dussem sulven breve, dat alles wu vorsteit mit unsem wetten, wyllen unnd volborde gescheen is. Des thor witschap hebben wy unser kercken grote insiegel ock an dussen breff mede don hangen, de gegeven is na Christi geborth Dusent funffhundert und einundvertzigsten jar, donerdages inn Paschenn.||