Wy Johannes abtt, Wilhelmus prior, Johannes Lubbeke senior und gantze conventh des closters sancti Michaelis bynnen Hildensem ordinis sancti Benedicti bekennen offentlig in und mit dussem breve vor uns, unßere nachkomen und sunst allermenniglich, datt wy van dem ersamen Hanße Heihen, wonhaftich tho Barvelte ihm gerichte Wintzenborg, tweihundertt gude fulwichtige Rynssche goltgulden upgebort und enthfangen, ock fortt in unße unnd unßers cloisters schinbarliche nuth, fromen und beste witliken gekartt und angewanth hebben. Vor solche summa tweihundertt gude fulwichtige Rynssche goltgulden hebben wy vor uns und unße nachkomen dem gedachten Hanße Heihen, Catherinen syner eheligen husfruwen und orhen erven unßern meigerhof mith dren hove landes mith aller gerechtigkeit und thobehoringe bynnen und buthen dem dorpe Barvelte gelegen in dorpe, in holte, in velde, wather, wisschen und weiden, nichts uthbescheiden, in aller mathen alße den hirbevorn Cordt Thonen und itzo bemelter Hans Heihen van uns in meigerstadt inne heft, up eynen wedderkoip vorkoft unnd vorkoipen jegenwordigen craft dusses breves, alßo datt Hans Heihen und syne medebenanten vorgerortes meigerhoffs mith aller gerechtigkeit und thobehoringe nach alle synem besten unnd bequemicheit de wile obbemelte hovetsumma unbetaltt, unvorwußett gebruken schall und mag. Idoch will und schall Hans Heihen und syne mithbenompten den schepfelschatz unnd anders wes dem fursten vonn Brunßwigk van gedachtem meigerhoffe geboren mochte sthaen edder sunst afschaffenn alßo unnd dergestaltt, datt wy und unße nakomen deshalven ungefordertt unnd unbelestigett syn und blyven mogen. Wy hebben aber uns unnd unßen nachkomen den gunsth bedingt unnd de macht vorbeholden, wo ock Hans Heihen vor sick und syne medebeschreven gelikesfals gedann, datt unßer ein dem andern welkorem dusse koip nichtt lengk gelevede allejarliges in denn veier hilligen dagen tho Winachten de loße kundigen mogenn, unnd welches jars van eynem deile de loßekundinge geschege, danne schullen unnd willen wy und unßere nachkomen up den negstkomende Osternn der loßekundinge allererstfolgende dem vorgerorten Hanße Heihen unnd synen medeschrevenn obgedachte tweihundertt gude fulwichtige Rynssche goltgulden hovethsummen gutlich unnd woll tho dancke anhe jennige ferner vortogerung wedderumb enthrichten, vornogen und betalen. Wan dan solche hovethsumma tweihundertt gude fulwichtige Rynssche goltgulden Hanße Heihen und synen medebeschreven betaltt, denne und nichtt ehir schal und will Hans Heihen und syne medebenompten uns und unßenn nachkomen henforder allejarlikes up Michaelisdag vorgerorten meigerhoff sampt den dren hove landes mith aller gerechtigkeit unnd thobehoringe mith achte molder roggen und achte molder haveren vortynßen in aller mathe alße he bißher gedan unnd den meigerhof van uns in meigerstadt inne heft. De wile aber de hovethsumma tweihundertt gude fulwichtige Rynssche goltgulden umbetaltt, schall Hans Heihen und syne mithbenompten schullen veilbemelten meigerhof und drei hove landes mit aller gerechtigkeit und thobehoringe unvortynßet nutten und gebruken anhe unße, unßerer nachkomen und idermenniglichs hinder edder verbedentt. Alle vorgerorten puncte und artikell dusses breves reden und loven wy obbemelte abtt, prior und gantze conventh des cloisters sancti Michaelis bynnen Hildenßem dem ehrgeschreven Hanße Heihen und synen medebenompten in guden truwen unnd geloven stede, vast und unvorbroken woll tho holdende sunder alle argelist und geferde. Des in orkunde der warheit hebben wy unßerer ebdie und cloisters ingesegelle witliken dhon hangen ahn dussen breif, nach Christi unßers hernn gebortt Vefteinhundertt darnach im negenundveftigesten jare, mandags in den hilligen Osternn.||